

ఉత్తరప్రదేశ్లోని బులంద్షహర్ జిల్లాలో ఢిల్లీ పోలీసులు, ఉత్తరప్రదేశ్ స్పెషల్ టాస్క్ఫోర్స్ (ఎస్టీఎఫ్) సంయుక్తంగా నిర్వహించిన ఆపరేషన్లో గ్యాంగ్స్టర్ నసీమ్ దురానీ హతమయ్యాడు. నవంబర్ 20న ఈ ఎన్కౌంటర్ చోటుచేసుకుంది. ఈ నెల 16న ఈశాన్య ఢిల్లీలోని సోనియా విహార్ ప్రాంతంలో ఢిల్లీ న్యాయశాఖ మంత్రి కపిల్ మిశ్రా క్యాంపు కార్యాలయం సమీపంలో 26 ఏళ్ల సమీర్ హత్యకు గురయ్యాడు. ఈ కేసులో నసీమ్ దురానీ నిందితుడిగా పోలీసులకు కావాల్సి ఉంది. దుండగులు సమీర్పై సుమారు 20 రౌండ్లు కాల్పులు జరిపినట్లు సమాచారం. నిఘా వర్గాల సమాచారం, సీసీటీవీ ఫుటేజీ ఆధారంగా దురానీ ఆచూకీ గుర్తించిన పోలీసులు బులంద్షహర్లోని సికంద్రా బైపాస్ సమీపంలో అతడిని అడ్డుకునేందుకు ప్రయత్నించారు. ఈ క్రమంలో ఇరువర్గాల మధ్య కాల్పులు జరిగాయి. బుల్లెట్ గాయాలతో తీవ్రంగా గాయపడిన దురానీని ఆస్పత్రికి తరలించగా.. అప్పటికే మృతి చెందినట్లు వైద్యులు ప్రకటించారు.
విచారణ అధికారుల సమాచారం ప్రకారం.. దురానీకి అండర్వరల్డ్ డాన్ దావూద్ ఇబ్రహీం నేతృత్వంలోని డీ-కంపెనీతో పాటు చోటా షకీల్తో సంబంధాలున్నట్లు ఆరోపణలు ఉన్నాయి. తీహార్ జైలులో గ్యాంగ్స్టర్ చోటా రాజన్ను హతమార్చేందుకు జరిగిన కుట్రలో, పాకిస్థానీ-కెనడియన్ జర్నలిస్ట్ తారెక్ ఫతాను లక్ష్యంగా చేసుకున్న కుట్రలోనూ అతడి ప్రమేయం ఉన్నట్లు అనుమానాలు వ్యక్తమయ్యాయి. హత్య, హత్యాయత్నం, సాయుధ దోపిడీ వంటి నేరాలకు సంబంధించి అతడిపై 25కు పైగా కేసులు నమోదైనట్లు పోలీసులు తెలిపారు. సమీర్ హత్య కేసులో దురానీ ఆచూకీ తెలిపిన వారికి ఢిల్లీ పోలీసులు రూ.50 వేల రివార్డు ప్రకటించారు. ఎన్కౌంటర్ జరిగిన ప్రాంతంలో రెండు .32 బోర్ పిస్టళ్లను స్వాధీనం చేసుకున్నట్లు సమాచారం.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!