

సముద్రపు అడుగుభాగంలో సముద్రపు గడ్డి ఊగుతున్నట్లుగా కనిపిస్తోందా? అయితే మీరు పొరబడినట్లే! అవి మొక్కలు కాదు.. తలను కిందకు, తోకను పైకి ఉంచి నిలువుగా ఈదే అరుదైన రకం చేపలు. వీటినే ‘రేజర్ఫిష్’ (Razorfish) అంటారు. సముద్రపు గడ్డి, పగడపు దిబ్బల మధ్య సులభంగా కలిసిపోయేలా ఉండే వీటి ప్రత్యేకమైన శరీర నిర్మాణం అందరినీ ఆశ్చర్యపరుస్తోంది. ప్రస్తుతం ఈ చేపలకు సంబంధించిన వీడియో సోషల్ మీడియాలో వైరల్గా మారింది. గుంపులుగా ఒకే దిశలో కదులుతూ సముద్రపు మొక్కల్లా కనిపించే వీటి వినూత్న ఈత శైలి నెటిజన్లను విశేషంగా ఆకట్టుకుంటోంది.
రేజర్ఫిష్ల శరీరం చాలా సన్నగా, చదునుగా ఉంటుంది. శరీరంపై ఉండే నల్లటి చారలు, తల కిందకు పెట్టి ఈదే ప్రత్యేకమైన అలవాటు వీటికి సహజ రక్షణ కవచంలా పనిచేస్తాయి. సముద్రపు గడ్డి లేదా పగడపు కొమ్మల మధ్య దాక్కున్నప్పుడు పెద్ద చేపలు సైతం వీటిని గుర్తించడం కష్టమవుతుంది. వీటి వేటాడే పద్ధతి కూడా ఎంతో ఆసక్తికరంగా ఉంటుంది. నోటి ముందు ఉండే పొడవైన గొట్టం లాంటి ముట్టెతో చిన్న క్రస్టేషియన్లను వాక్యూమ్లా పీల్చుకుని ఆహారంగా తీసుకుంటాయి. శాస్త్రీయ అధ్యయనాల ప్రకారం, వీటి ఆహారాన్ని పట్టుకునే చర్య కేవలం 4 మిల్లీసెకన్లలోనే పూర్తవుతుంది. అంటే మనిషి కనురెప్ప వేయడానికి పట్టే సమయం కంటే ఎంతో వేగంగా ఇవి వేటాడతాయి. సముద్ర జీవుల్లో ప్రకృతి సృష్టించిన అద్భుతాలకు రేజర్ఫిష్లు మరో నిదర్శనంగా నిలుస్తున్నాయి.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!