బిగ్ బాస్ తెలుగు 10: నందనకు ఇంత రెమ్యునరేషనా?

‘నందూస్ వరల్డ్’ పేరుతో సోషల్ మీడియాలో పాపులర్ అయిన ప్రముఖ యూట్యూబర్ నందన బిగ్ బాస్ తెలుగు 10లో వైల్డ్ కార్డ్ కంటెస్టెంట్‌గా ఎంట్రీ ఇవ్వనుందనే ప్రచారం జోరుగా సాగుతోంది. నందనకు యూట్యూబ్‌లో సుమారు 28 లక్షల మంది సబ్‌స్క్రైబర్లు ఉన్నారు. ఈ క్రేజ్‌తో ఆమె ఈ ఏడాది సంక్రాంతికి విడుదలైన మన శంకర వరప్రసాద్ గారు సినిమాలో క్యామియో రోల్‌లోనూ కనిపించింది. అయితే ఇటీవల ఉద్యోగ అవకాశాలు కల్పిస్తామంటూ నందన, ఆమె భర్త పలువురి నుంచి డబ్బులు తీసుకున్నారనే ఆరోపణలు తెరపైకి వచ్చాయి. ఈ వ్యవహారంలో రెండు తెలుగు రాష్ట్రాల్లో కేసులు నమోదైనట్లు, లుకౌట్ నోటీసులు కూడా జారీ అయినట్లు సమాచారం. భారత్‌కు తిరిగి వచ్చిన నందన హైదరాబాద్ ఎయిర్‌పోర్టులో పోలీసులకు చిక్కడం కూడా అప్పట్లో చర్చనీయాంశమైంది.

ఈ నేపథ్యంలోనే నందనకు బిగ్ బాస్ 10లో అవకాశం దక్కిందని, త్వరలో వైల్డ్ కార్డ్ ద్వారా ఆమె హౌస్‌లోకి అడుగుపెట్టనుందని రూమర్స్ వినిపిస్తున్నాయి. అంతేకాదు, ఆమెకు వారానికి సుమారు రూ.2 లక్షల పారితోషికం ఇచ్చేందుకు నిర్వాహకులు సిద్ధమైనట్లు కూడా ప్రచారం జరుగుతోంది. అయితే ఈ వార్తలపై సోషల్ మీడియాలో తీవ్ర వ్యతిరేకత వ్యక్తమవుతోంది. నందనను బిగ్ బాస్‌లోకి తీసుకుంటే ఊరుకోబోమంటూ కొందరు కాంగ్రెస్ నాయకులు షో నిర్వాహకులు, హోస్ట్ నాగార్జునను హెచ్చరించినట్లు సమాచారం. అయితే నందన బిగ్ బాస్ 10లోకి నిజంగానే ఎంట్రీ ఇస్తుందా లేదా అన్నది మాత్రం అధికారిక ప్రకటన వచ్చే వరకు స్పష్టత లేదు.