మరాఠీ పాటకు ‘మాయ’ రోబో డాన్స్..

రోబోలకు ఎంతటి తెలివితేటలు ఉన్నప్పటికీ.. మనుషుల్లా సహజమైన కదలికలు సాధించడం ఇప్పటివరకు పెద్ద సవాలుగానే ఉంది. సాధారణంగా రోబోలు నడిచినా, ఏదైనా కదలిక చేసినా యాంత్రికంగానే కనిపిస్తాయి. అయితే ‘మాయ’ అనే హ్యూమనాయిడ్‌ రోబో ఈ అభిప్రాయాన్ని మార్చేలా తన డాన్స్‌తో ఆకట్టుకుంటోంది. మనదేశానికి చెందిన ట్యూస్‌డే ల్యాబ్స్‌, మాస్టర్స్‌ యూనియన్‌ సంయుక్తంగా మాయను అభివృద్ధి చేశాయి. మోషన్ క్యాప్చర్‌ టెక్నాలజీ, రీయిన్‌ఫోర్స్‌మెంట్ లెర్నింగ్‌ విధానాలను ఉపయోగించి మాయకు నృత్య కదలికల్లో శిక్షణ ఇచ్చారు. సినిమాల్లో, ముఖ్యంగా జేమ్స్‌ కామెరూన్‌ అవతార్లో ఉపయోగించిన మోషన్ క్యాప్చర్‌ సాంకేతికత తరహా విధానాలను ఇందులో వినియోగించారు.

‘వజ్లే కీ బారా’ అనే మరాఠీ పాటకు మాయ చేసిన నృత్యం ప్రస్తుతం సోషల్ మీడియాలో వైరల్‌గా మారింది. రోబో సాధారణ యాంత్రిక కదలికలకు భిన్నంగా సంప్రదాయ నృత్య కళాకారిణిలా సహజంగా కదలడం నెటిజన్లను ఆకట్టుకుంటోంది. ఇదిలా ఉండగా, అమెరికాలోని యూనివర్సిటీ ఆఫ్ మేరీల్యాండ్, బాల్టిమోర్ కౌంటీకి చెందిన పరిశోధకులు కూడా రోబోల కదలికలను మరింత మానవీయంగా మార్చే దిశగా పరిశోధనలు చేస్తున్నారు. భరతనాట్యంలోని ముద్రలను ఉపయోగించి ఏఐ సాయంతో రోబోలకు శిక్షణ ఇచ్చే విధానాలను వారు పరిశీలిస్తున్నారు.