గోపిక ఆరోగ్యంపై మణిపాల్‌ ఆస్పత్రి హెల్త్‌ బులెటిన్‌

రాప్తాడుకు చెందిన గోపిక ఆరోగ్య పరిస్థితి క్రమంగా మెరుగుపడుతోంది. బెంగళూరులోని మణిపాల్‌ ఆస్పత్రిలో చికిత్స పొందుతున్న బాలికకు శస్త్రచికిత్స అనంతరం వైద్యులు వెంటిలేటర్‌ తొలగించారు. వైద్యులు పిలిచినప్పుడు స్పందిస్తూ గోపిక ఒక్కో పదంతో మాట్లాడుతోందని తాజా హెల్త్‌ బులెటిన్‌లో వెల్లడించారు. ప్రస్తుతం ఆమె ఆరోగ్య పరిస్థితి నిలకడగా ఉందని, పీఐసీయూలో అందిస్తున్న హైఫ్లో ఆక్సిజన్‌ సాయాన్ని వైద్యులు క్రమంగా తగ్గిస్తున్నారని తెలిపారు.

ముక్కు ద్వారా అందిస్తున్న ఆహారాన్ని గోపిక సజావుగా స్వీకరిస్తోందని వైద్యులు పేర్కొన్నారు. రక్తహీనత కారణంగా ఆమెకు రక్తమార్పిడి చేశారు. అవయవాల కదలికలు మెరుగుపడేందుకు, ఛాతీ వ్యాయామాల కోసం ఫిజియోథెరపీ అందిస్తున్నారు. యాంటీబయాటిక్స్‌, నొప్పి నివారణ మందులతో పాటు ఇతర సహాయక చికిత్సలు కొనసాగుతున్నాయి. వైద్య బృందం గోపిక ఆరోగ్య పరిస్థితిని నిరంతరం పర్యవేక్షిస్తోంది. ఏపీ వైద్యారోగ్య శాఖ మంత్రి సత్యకుమార్‌ యాదవ్‌ వైద్యులతో మాట్లాడి బాలిక ఆరోగ్య పరిస్థితిపై వివరాలు తెలుసుకున్నారు.