గుంటూరు జిల్లాలో ‘మురసు’ బీభత్సం..

‘మురసు’ తుపాను ప్రభావంతో గుంటూరు జిల్లాలో భారీ వర్షాలు కురుస్తున్నాయి. దీంతో లోతట్టు ప్రాంతాలు జలమయమయ్యాయి. పెదనందిపాడు మండలం వరగాని గ్రామంలో ఈదురుగాలుల ధాటికి విద్యుత్తు స్తంభాలు కూలిపోయాయి. ఫలితంగా ఆ ప్రాంతంలో విద్యుత్తు సరఫరాకు అంతరాయం ఏర్పడింది. జిల్లాలోని పలు ప్రాంతాల్లో భారీ వృక్షాలు నేలకొరిగాయి. తుపాను ప్రభావంతో జనజీవనం అస్తవ్యస్తంగా మారింది.

పెదనందిపాడు-కొమ్మూరు రహదారిపై భారీ వృక్షం కూలిపోవడంతో పోలీసులు క్రేన్‌ సాయంతో దాన్ని తొలగించారు. కాకుమాను ప్రధాన రహదారిపై భారీగా వరద నీరు ప్రవహిస్తోంది. పెదనందిపాడు-గుంటూరు రహదారిపైకి కూడా వర్షపు నీరు చేరడంతో వాహనాల రాకపోకలకు ఇబ్బందులు ఎదురవుతున్నాయి. తుపాను కారణంగా భారీ వర్షాలతో పాటు చెట్లు, విద్యుత్తు స్తంభాలు కూలిపోవడం పలు ప్రాంతాల్లో రహదారులు, విద్యుత్తు సరఫరాపై ప్రభావం చూపుతోంది.