తల్లికి వందనం రెండో విడతపై కీలక అప్‌డేట్

ఏపీలో తల్లికి వందనం పథకం రెండో విడత ఆర్థిక సాయం కోసం సుమారు 3 లక్షల మంది విద్యార్థుల తల్లిదండ్రులు ఎదురుచూస్తున్నారు. రెండో విడతలో అర్హులైన వారికి ఒక్కో విద్యార్థికి రూ.13 వేల చొప్పున సాయం అందించనున్నట్లు సమాచారం. కొత్తగా మొదటి తరగతి, ఇంటర్‌ ఫస్టియర్‌లో చేరిన విద్యార్థులతో పాటు సాంకేతిక కారణాలతో తొలి విడతలో ప్రయోజనం పొందలేని అర్హులకు ఈ విడతలో నగదు జమ చేయనున్నట్లు తెలుస్తోంది.

తొలి విడతలో జూలై 22న 64.76 లక్షల మంది విద్యార్థులకు నిధులు జమయ్యాయి. ఆగస్టు 30న రెండో విడత నిధులు విడుదల కావాల్సి ఉన్నప్పటికీ ఆలస్యమయ్యాయి. దీంతో అక్టోబర్‌ తొలి లేదా రెండో వారంలో నిధులు జమ చేసే అవకాశం ఉన్నట్లు సమాచారం. చెల్లింపుల్లో ఎలాంటి ఇబ్బందులు లేకుండా విద్యార్థి, తల్లి ఆధార్‌, ఈ-కేవైసీ, బ్యాంకు ఖాతా, ఐఎఫ్‌ఎస్‌సీ, ఆధార్‌-బ్యాంకు లింకింగ్‌తో పాటు పాఠశాల లేదా కళాశాల వివరాలను సరిచూసుకోవాలని సూచిస్తున్నారు.