సెక్రటేరియట్ ఉద్యోగాల పేరుతో మోసం.. కేటుగాడు అరెస్ట్

హైదరాబాద్‌లోని సెక్రటేరియట్ సమీపంలో ఉద్యోగాల పేరుతో భారీ మోసం వెలుగులోకి వచ్చింది. పంచాయతీరాజ్ శాఖలో ప్రభుత్వ ఉద్యోగాలు ఇప్పిస్తానంటూ నిరుద్యోగుల నుంచి భారీ మొత్తంలో డబ్బులు వసూలు చేసిన ఓ కేటుగాడు పోలీసులకు చిక్కాడు. తన పరిచయాలతో ఉద్యోగాలు ఇప్పించగలనని నమ్మబలికి పలువురిని మోసం చేసినట్లు సమాచారం.

ఉద్యోగం వచ్చిందంటూ ఒక అభ్యర్థిని సెక్రటేరియట్ వద్దకు పిలిపించిన నిందితుడు, అతనికి నకిలీ నియామక పత్రం అందజేశాడు. అనంతరం ఏటీఎం నుంచి డబ్బులు తీసి ఇవ్వాలని డిమాండ్ చేసినట్లు తెలుస్తోంది. ఈ వ్యవహారాన్ని గమనించిన సెక్రటేరియట్ భద్రతా సిబ్బంది (SPF) వెంటనే స్పందించి నిందితుడిని అదుపులోకి తీసుకున్నారు. ఘటనపై పోలీసులు దర్యాప్తు కొనసాగిస్తున్నారు.