షేక్‌ హసీనా అప్పగింతపై భారత్‌ కీలక షరతులు.. రెండు హామీలు తప్పనిసరి

బంగ్లాదేశ్‌ మాజీ ప్రధాని షేక్‌ హసీనాను స్వదేశానికి అప్పగించే అంశంపై భారత్‌ కీలక షరతులు విధించినట్లు సమాచారం. ఆమె భద్రతకు, నిష్పక్షపాత న్యాయ విచారణకు బంగ్లాదేశ్‌ ప్రభుత్వం రాతపూర్వక హామీ ఇవ్వాలని భారత్‌ కోరుతున్నట్లు తెలుస్తోంది. హసీనాను ఢిల్లీ నుంచి బంగ్లాదేశ్‌కు తరలించే బాధ్యతను ఆ దేశ సైన్యమే పూర్తిగా తీసుకోవాలని స్పష్టం చేసినట్లు సమాచారం. విమాన మార్గంలో లేదా భూమార్గంలో తరలించినా ఆమె రక్షణకు సైన్యమే బాధ్యత వహించాలని భారత్‌ షరతు పెట్టినట్లు కథనాలు వెల్లడిస్తున్నాయి.

బంగ్లాదేశ్‌ న్యాయస్థానం విధించిన మరణశిక్షపై హసీనాకు అప్పీల్‌ చేసుకునే అవకాశం కల్పించాలని కూడా భారత్‌ కోరుతున్నట్లు తెలుస్తోంది. ఆమెకు న్యాయపరమైన ప్రక్రియలో తగిన అవకాశాలు కల్పించాలన్నది భారత వైఖరిగా సమాచారం. ఇదిలా ఉండగా, హసీనా కొత్త పాస్‌పోర్టు కోసం దరఖాస్తు చేసుకున్నట్లు వార్తలు వస్తున్నాయి. డిసెంబర్‌లో ఆమె బంగ్లాదేశ్‌కు తిరిగి వెళ్లే అవకాశాలపై చర్చ జరుగుతున్న నేపథ్యంలో అప్పగింత వ్యవహారం ఆసక్తికరంగా మారింది. అయితే ఈ షరతులకు సంబంధించి అధికారిక ప్రకటన వెలువడాల్సి ఉంది.