మేకెదాటు ప్రాజెక్టుపై కర్ణాటక, తమిళనాడు కాంగ్రెస్‌ నేతల మధ్య మాటల యుద్ధం

మేకెదాటు డ్యాం ప్రాజెక్టు వివాదం కర్ణాటక, తమిళనాడు రాష్ట్రాల మధ్య మరోసారి రాజకీయ వేడిని పెంచింది. ఈ ప్రాజెక్టు నిర్మాణాన్ని ఎవరూ అడ్డుకోలేరంటూ ప్రధాని మోదీ సమక్షంలో కర్ణాటక సీఎం డీకే శివకుమార్‌ చేసిన వ్యాఖ్యలపై తమిళనాడు కాంగ్రెస్‌ తీవ్ర అభ్యంతరం వ్యక్తం చేసింది. దిగువ రాష్ట్రాల అనుమతి లేకుండా ప్రాజెక్టు నిర్మాణానికి ఒక్క ఇటుక కూడా వేయనివ్వబోమని తమిళనాడు కాంగ్రెస్‌ చీఫ్‌ మాణికం ఠాగూర్‌ స్పష్టం చేశారు.

మైసూరులో ప్రధాని మోదీ పాల్గొన్న సభలో డీకే శివకుమార్‌ మాట్లాడుతూ.. మేకెదాటు ప్రాజెక్టు నిర్మాణానికి సంబంధించి కర్ణాటకకు అనుకూలంగా సుప్రీంకోర్టు తీర్పు వచ్చిందని, ప్రాజెక్టుకు అవసరమైన అనుమతులు మంజూరు చేయాలని కేంద్రాన్ని కోరారు. అయితే, ఈ డ్యాం వల్ల తమిళనాడుకు ఎలాంటి నష్టం జరగదన్న ఆయన వ్యాఖ్యలను మాణికం ఠాగూర్‌ తోసిపుచ్చారు. అవి నిరాధారమైనవని విమర్శించారు. దిగువ రాష్ట్రాల సమ్మతి లేకుండా ఎలాంటి నిర్మాణం చేపట్టకూడదని, కేంద్రం కూడా అనుమతులు ఇవ్వకూడదని డిమాండ్‌ చేశారు. ప్రాజెక్టు నిర్మిస్తే కావేరీ డెల్టా ప్రాంతం ఎడారిగా మారే ప్రమాదం ఉందని ఆందోళన వ్యక్తం చేశారు.