హైదరాబాద్‌ రియల్‌ ఎస్టేట్‌లో మరో సంచలనం..

హైదరాబాద్‌ ఐటీ కారిడార్‌లో భూముల ధరలు మరోసారి సరికొత్త రికార్డు సృష్టించాయి. రాయదుర్గంలో ఎకరం భూమి ఏకంగా రూ.269 కోట్ల ధర పలికింది. వారం క్రితం ఇదే ప్రాంతంలోని సమీప ప్లాట్‌లో ఎకరానికి రూ.264 కోట్లు పలకగా.. తాజాగా ఆ రికార్డును అధిగమిస్తూ రూ.269 కోట్ల ధర నమోదైంది. రాయదుర్గం సర్వే నంబర్‌ 83/1లోని 5.38 ఎకరాల భూమికి తెలంగాణ స్టేట్‌ ఇండస్ట్రియల్‌ ఇన్‌ఫ్రాస్ట్రక్చర్‌ కార్పొరేషన్‌ (టీజీఐఐసీ) ఆన్‌లైన్‌ వేలం నిర్వహించింది. ఎకరానికి రూ.175 కోట్లను కనీస ధరగా నిర్ణయించగా.. రూ.10 కోట్ల ముందస్తు మొత్తాన్ని చెల్లించిన వారికి వేలంలో పాల్గొనే అవకాశం కల్పించారు.

ఈ వేలంలో పలు రియల్‌ ఎస్టేట్‌ సంస్థలు పోటీపడ్డాయి. చివరికి వంశీరాం బిల్డర్స్‌ ఎకరానికి రూ.269 కోట్ల చొప్పున మొత్తం 5.38 ఎకరాలను దక్కించుకుంది. దీంతో ఈ లావాదేవీ ద్వారా ప్రభుత్వానికి సుమారు రూ.1,447 కోట్ల ఆదాయం సమకూరింది. హైదరాబాద్‌ ఐటీ, వాణిజ్య కారిడార్‌లో ప్రీమియం భూములకు కొనసాగుతున్న భారీ డిమాండ్‌కు ఈ వేలం మరోసారి నిదర్శనంగా నిలిచింది. రాయదుర్గం ప్రాంతంలో భూముల ధరలు వరుసగా కొత్త రికార్డులు నమోదు చేస్తుండటం రియల్‌ ఎస్టేట్‌ వర్గాల్లో ఆసక్తిని పెంచుతోంది.