మైక్రోడక్‌తో ఏఐ రోబోటిక్స్‌లో కొత్త ప్రయోగం...

బీజింగ్‌లో జరిగిన రోబో ఒలింపిక్స్‌లో హ్యూమనాయిడ్‌ రోబోలు పరుగులు, మార్షల్‌ ఆర్ట్స్‌, అడ్డంకులను దాటడం వంటి విన్యాసాలతో ఆకట్టుకుంటుండగా.. హగ్గింగ్‌ ఫేస్‌ మాత్రం అందుకు భిన్నంగా చిన్నదైన, బాతు ఆకారాన్ని పోలిన ‘మైక్రోడక్‌’ రోబోను పరిచయం చేసింది. కేవలం 25 సెంటీమీటర్ల ఎత్తు, గరిష్ఠంగా 800 గ్రాముల బరువున్న ఈ బైపెడ్‌ రోబో ధర 399 డాలర్లు. ఇందులో 15కుపైగా మోటార్లు, కెమెరా, లైడార్‌ సెన్సర్లు, రెండు ఇనర్షియల్‌ మెజర్‌మెంట్‌ యూనిట్లు ఉన్నాయి. కిందపడిన తర్వాత తిరిగి నిలబడేలా బ్యాలెన్స్‌ రీస్టోరేషన్‌ సదుపాయం కూడా ఉంది.

మైక్రోడక్‌లో వాకింగ్‌, కూర్చోవడం, నిలబడటం, కిక్‌ చేయడం, ముక్కుతో వస్తువులను ఎత్తడం, రోలర్‌ స్కేటింగ్‌, వెనుకకు పడిపోయిన తర్వాత తిరిగి లేవడం వంటి ఏడు ప్రీ-ట్రెయిన్డ్‌ మూవ్‌మెంట్లు అందుబాటులో ఉన్నాయి. ఓపెన్‌ సోర్స్‌ కావడం దీని ప్రత్యేకత. రీఇన్‌ఫోర్స్‌మెంట్‌ లెర్నింగ్‌ ద్వారా వినియోగదారులు కొత్త పనులను నేర్పించడంతో పాటు రోబోను ఫైన్‌ట్యూన్‌ చేసి మళ్లీ డిప్లాయ్‌ చేయవచ్చు. హగ్గింగ్‌ ఫేస్‌ SDK, సిమ్యులేషన్‌, పూర్తి రీఇన్‌ఫోర్స్‌మెంట్‌ లెర్నింగ్‌ ట్రైనింగ్‌ స్టాక్‌ను GitHubలో అందుబాటులోకి తెచ్చింది. ఆగస్టు 27 నుంచి ప్రీ-ఆర్డర్లు ప్రారంభమయ్యాయి. 2026 క్రిస్మస్‌కు ముందే డెలివరీలు ప్రారంభమయ్యే అవకాశం ఉంది. ఆరెంజ్‌-గ్రే, పర్పుల్‌-గ్రే, బ్లాక్‌-గ్రే, బ్లూ-గ్రే రంగుల్లో దీని షెల్స్‌ లభించనున్నాయి.