ఎస్‌ఐఆర్‌ ప్రక్రియపై ఈసీకి హైకోర్టు ఆదేశాలు

తెలంగాణలో కొనసాగుతున్న ప్రత్యేక సమగ్ర ఓటర్ల జాబితా సవరణ (ఎస్‌ఐఆర్‌) ప్రక్రియలో భాగంగా ఓటర్లకు నోటీసులు జారీ చేస్తున్న విధానంపై హైకోర్టు కేంద్ర ఎన్నికల సంఘాన్ని వివరణ కోరింది. ఎన్యుమరేషన్‌ పత్రాల్లో లోపాలు ఉన్నాయని గుర్తించి నోటీసులు ఇచ్చేందుకు అనుసరిస్తున్న ప్రమాణాలు ఏమిటో, అలాగే ఈసీఐనెట్‌, ఈఆర్‌ఓనెట్‌ వంటి ఆటోమేటెడ్‌ డేటా మ్యాచింగ్‌ వ్యవస్థలు ఎలా పనిచేస్తున్నాయో వివరించాలని ఆదేశించింది.

ఎస్‌.క్యూ. మసూద్‌ దాఖలు చేసిన పిటిషన్‌పై జస్టిస్‌ పి. శ్యాంకోశి, జస్టిస్‌ నర్సింగ్‌రావు నందికొండల ధర్మాసనం విచారణ చేపట్టింది. భౌతిక రికార్డులను తగినంతగా పరిశీలించకుండానే ఆటోమేటెడ్‌ విధానం ఆధారంగా ఓటర్లను గుర్తిస్తున్నారని పిటిషనర్‌ తరఫు న్యాయవాది వాదించారు. మరోవైపు, పిటిషనర్‌ తండ్రి పేరులో ప్రస్తుత, గత ఓటర్ల జాబితాల మధ్య వ్యత్యాసం ఉండటంతో నోటీసు ఇచ్చినట్లు ఈసీ తరఫు న్యాయవాది తెలిపారు. నోటీసుకు ఓటరు వివరణ ఇచ్చిన తర్వాత అధికారులు తీసుకున్న చర్యలు, నోటీసుల జారీకి అనుసరిస్తున్న పూర్తి విధానాన్ని సమర్పించాలని ధర్మాసనం ఆదేశించింది. తదుపరి విచారణను అక్టోబర్‌ 13కు వాయిదా వేసింది.