

అమెరికాలోని క్రైస్తవులు పెళ్లి చేసుకుని ఎక్కువ మంది పిల్లల్ని కనాలని వైట్హౌస్ మాజీ ప్రెస్ సెక్రటరీ కరోలిన్ లీవిట్ సూచించారు. 2035 నాటికి ప్రపంచవ్యాప్తంగా ముస్లింల జనాభా క్రైస్తవుల సంఖ్యను అధిగమించవచ్చంటూ వెలువడిన జనాభా అంచనాల నేపథ్యంలో ఆమె చేసిన వ్యాఖ్యలు చర్చనీయాంశంగా మారాయి. ఈ మేరకు ఎక్స్ వేదికగా అమెరికన్లకు పలు సూచనలు చేశారు. 'పెళ్లి చేసుకోండి. ఎక్కువ మంది పిల్లల్ని కనండి. వారిని పవిత్ర చర్చ్ వాతావరణంలో పెంచండి. అమెరికాను ప్రేమించడం మీ పిల్లలకు నేర్పించండి' అని ఆమె తన పోస్టులో పేర్కొన్నారు. ఈ వ్యాఖ్యలు సోషల్ మీడియాలో వైరల్ కావడంతో పలువురు నెటిజన్లు భిన్నాభిప్రాయాలు వ్యక్తం చేస్తున్నారు.
జీవన వ్యయం భారీగా పెరుగుతున్న సమయంలో ఎక్కువ మంది పిల్లల్ని కనాలని సూచించడం ఎంతవరకు సమంజసమని కొందరు ప్రశ్నిస్తున్నారు. పిల్లల పెంపకం, విద్య, ఆలనా పాలనా ఖర్చులు రోజురోజుకూ పెరుగుతున్నాయని కామెంట్లు చేస్తున్నారు. అంతేకాకుండా తల్లిదండ్రుల మత విశ్వాసాలను పిల్లలపై రుద్దకూడదని, వారు పెద్దయ్యాక తమకు నచ్చిన మతాన్ని ఎంచుకునే స్వేచ్ఛ ఉండాలని మరికొందరు అభిప్రాయపడుతున్నారు. మతాల జనాభా పెరుగుదల కోసం పిల్లల సంఖ్యను పెంచుకోవడం సరైనదేనా అని ఇంకొందరు ప్రశ్నిస్తుండగా, లీవిట్ వ్యాఖ్యలకు మద్దతు తెలిపిన వారు కూడా ఉన్నారు. ఇదిలా ఉండగా, ప్యూ రీసెర్చ్ సెంటర్ అంచనాల ప్రకారం 2020లో ప్రపంచవ్యాప్తంగా క్రైస్తవుల జనాభా 227 కోట్లుగా, ముస్లింల జనాభా 202 కోట్లుగా ఉంది. 2035 నాటికి ముస్లింల జనాభా 257 కోట్లకు, క్రైస్తవుల జనాభా 252 కోట్లకు చేరవచ్చని నివేదిక అంచనా వేసింది.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!