అనంత్ సింగ్ కుమార్తె పెళ్లికి భారీ ఏర్పాట్లు..

బిహార్ మాజీ ఎమ్మెల్యే అనంత్ సింగ్ కుమార్తె శివాంగి సింగ్ వివాహం ఇప్పుడు దేశవ్యాప్తంగా చర్చనీయాంశంగా మారింది. నవంబర్ 25న జరగనున్న ఈ వేడుకను అత్యంత వైభవంగా నిర్వహించేందుకు భారీ ఏర్పాట్లు చేస్తున్నారు. బాలీవుడ్, భోజ్‌పురి సినీ ప్రముఖులతో పాటు దుబాయ్‌కు చెందిన ఆరుగురు మోడళ్లను కూడా ఆహ్వానించినట్లు సమాచారం. పలువురు రాజకీయ ప్రముఖులకు ఆహ్వానాలు పంపించారు. తన కుమార్తెకు సుమారు రూ.2.5 కోట్ల నుంచి రూ.3 కోట్ల విలువైన ల్యాండ్ రోవర్ డిఫెండర్ కారును అనంత్ సింగ్ బహుమతిగా ఇచ్చారు. అలాగే తన చిన్న కుమారుడు అభినవ్ కోసం సుమారు రూ.కోటి విలువైన బీఎండబ్ల్యూ కారును కొనుగోలు చేశారు. శివాంగి సింగ్‌కు పాట్నాలోని బిహ్తా ప్రాంతానికి చెందిన రణ్‌విజయ్ కుమార్ కుమారుడు రిషికేష్ కుమార్ అలియాస్ అంకిత్‌తో వివాహం జరగనుంది. ఎంబీఏ పూర్తి చేసిన అంకిత్ గత కొన్నేళ్లుగా అమెరికాలో నివసిస్తున్నారు. వివాహ వేడుకలతో పాటు కుమారుడి జనేయు కార్యక్రమాన్ని కూడా నిర్వహించనున్నారు.

ఈ వివాహం కోసం మూడు ఎకరాలకు పైగా విస్తీర్ణంలో భారీ వేదికను, గుర్రపు పందేల కోసం మరో ఐదు ఎకరాల్లో ప్రత్యేక మైదానాన్ని సిద్ధం చేస్తున్నారు. సుమారు నాలుగు లక్షల మంది అతిథులు హాజరవుతారని అంచనా వేస్తున్నారు. జైమాల వేడుక కోసం 30 అడుగుల ఎత్తైన వేదికను నిర్మిస్తుండగా, అలంకరణ కోసం చైనా, బెంగళూరు నుంచి పూలను తెప్పిస్తున్నారు. ఉత్తరప్రదేశ్‌లోని మౌ ప్రాంతం నుంచి ప్రత్యేకంగా టెంట్ కార్మికులను రప్పిస్తున్నారు. నవంబర్ 25న మధ్యాహ్నం గుర్రపు పందేలు నిర్వహించనున్నారు. విజేతకు ఎస్‌యూవీ కారు, రెండో స్థానంలో నిలిచిన వారికి బైక్, మూడో స్థానంలో నిలిచిన వారికి స్కూటీ బహుమతిగా ఇవ్వనున్నారు. అతిథుల కోసం బిహార్ సంప్రదాయ వంటకాలతో పాటు మొత్తం 150కి పైగా రకాల వంటకాలను సిద్ధం చేస్తున్నారు. మరోవైపు ప్రధాని నరేంద్ర మోదీ, నితీష్ కుమార్, లాలూ ప్రసాద్ యాదవ్, తేజస్వి యాదవ్ తదితర రాజకీయ ప్రముఖులను ఆహ్వానించాలని అనంత్ సింగ్ భావిస్తున్నారు. దుల్లార్‌చంద్ హత్య కేసులో డిసెంబర్ 4న లొంగిపోవాలని సుప్రీంకోర్టు అనంత్ సింగ్‌ను ఆదేశించిన నేపథ్యంలో ఈ వివాహ వేడుక మరింత ఆసక్తిని రేకెత్తిస్తోంది.