హసీనా రాకపై బంగ్లాదేశ్ ప్రాసిక్యూటర్ కీలక వ్యాఖ్యలు!

బంగ్లాదేశ్ మాజీ ప్రధాని షేక్ హసీనా తిరిగి దేశానికి వస్తే, ఆమెకు విధించిన మరణశిక్షను అమలు చేయడం తప్ప మరో మార్గం లేదని ఆ దేశ ప్రాసిక్యూటర్ ఎండీ అమీనుల్ ఇస్లాం స్పష్టం చేశారు. 2024లో విద్యార్థుల ఆధ్వర్యంలో జరిగిన ప్రజా తిరుగుబాటును అణచివేసిన ఘటనకు సంబంధించి నమోదైన మానవాళికి వ్యతిరేక నేరాల కేసులో 2025 నవంబర్‌లో బంగ్లాదేశ్ కోర్టు హసీనాకు ఆమె గైర్హాజరీలోనే మరణశిక్ష విధించింది. హత్యలకు ప్రేరేపించడం, దాడులను అడ్డుకోవడంలో విఫలమవడం సహా మూడు ప్రధాన నేరాల్లో ఆమెను దోషిగా నిర్ధారించింది. చట్టం ప్రకారం తీర్పు వెలువడిన 30 రోజుల్లోగా అప్పీల్ దాఖలు చేయాల్సి ఉంటుందని, ఆ గడువు ఇప్పటికే ముగిసిపోయిందని ప్రాసిక్యూటర్ తెలిపారు. ప్రస్తుతం భారత్‌లో ఉంటున్న హసీనా డిసెంబర్‌లో బంగ్లాదేశ్‌కు తిరిగి రావచ్చన్న వార్తలపై స్పందిస్తూ, ఆమెకు ఇక ఎలాంటి చట్టపరమైన అవకాశాలు లేవని, కోర్టు విధించిన శిక్షను ఎదుర్కోవాల్సిందేనని పేర్కొన్నారు.

మరోవైపు, తనపై జరిగిన విచారణను హసీనా రాజకీయ నాటకంగా అభివర్ణించారు. మరణశిక్ష ఎదురయ్యే అవకాశం ఉన్నప్పటికీ డిసెంబర్‌లో బంగ్లాదేశ్‌కు తిరిగి రావాలనే ఉద్దేశంతో ఉన్నట్లు ఆమె ప్రకటించారు. ప్రజల పట్ల తనకున్న బాధ్యతను భయం నిర్ణయించలేదని వ్యాఖ్యానించారు. 2024 ఆగస్టులో విద్యార్థుల ఆధ్వర్యంలో జరిగిన భారీ నిరసనలతో హసీనా ప్రభుత్వం కూలిపోయింది. దీంతో ఆమె 15 ఏళ్ల పాలన ముగిసింది. ఆ సమయంలో హెలికాప్టర్‌లో బంగ్లాదేశ్‌ను విడిచిపెట్టిన ఆమె భారత్‌లో ఆశ్రయం పొందుతున్నారు. ఐక్యరాజ్యసమితి అంచనాల ప్రకారం, 2024 నిరసనల అణచివేతలో సుమారు 1,400 మంది ప్రాణాలు కోల్పోయారు. ఇదిలా ఉండగా, హసీనాను తమకు అప్పగించాలని బంగ్లాదేశ్ ప్రభుత్వం భారత్‌ను అధికారికంగా కోరింది. ఈ అభ్యర్థన ప్రస్తుతం న్యాయపరమైన పరిశీలనలో ఉందని భారత్ వెల్లడించింది. హసీనా భారత్‌లో కొనసాగుతున్న పరిణామం ఇరు దేశాల మధ్య దౌత్య సంబంధాల్లోనూ కీలక అంశంగా మారింది.