పదేళ్ల ప్రేమకు పెళ్లి బంధంతో ముగింపు పలకనున్న ప్రియా భవానీ శంకర్

కోలీవుడ్ నటి ప్రియా భవానీ శంకర్ ప్రస్తుతం తెలుగు, తమిళ భాషల్లో వరుస సినిమాలతో బిజీగా ఉన్నారు. ఇటీవల ఇరుముడి సినిమాతో మంచి విజయాన్ని అందుకున్నట్లు కథనాలు వెలువడగా, ప్రస్తుతం డిమాంటి కాలనీ 3, అహం బ్రహ్మస్మీ, మరకతమణి 2 వంటి ఆసక్తికర ప్రాజెక్టులతో ప్రేక్షకుల ముందుకు రానున్నారు. ఒకవైపు కెరీర్ పరంగా దూసుకుపోతున్న ఈ నటి, మరోవైపు తన వ్యక్తిగత జీవితానికి సంబంధించిన వార్తలతో సోషల్ మీడియాలో చర్చనీయాంశంగా మారారు. దాదాపు పదేళ్లుగా ప్రేమలో ఉన్న ప్రియా భవానీ శంకర్, తన చిరకాల ప్రియుడు రాజ్‌వెల్ రాజ్‌ను త్వరలో వివాహం చేసుకోబోతున్నట్లు ప్రచారం జరుగుతోంది.

తాజా సమాచారం ప్రకారం, ఈ జంట డిసెంబర్‌లో పెళ్లి చేసుకోవాలని భావిస్తున్నట్లు తెలుస్తోంది. ఈ వేడుకను కుటుంబ సభ్యులు, అత్యంత సన్నిహితుల సమక్షంలో ఎలాంటి ఆర్భాటాలు లేకుండా నిరాడంబరంగా నిర్వహించాలని ప్లాన్ చేస్తున్నట్లు కథనాలు పేర్కొంటున్నాయి. ఇటీవల ప్రియా తన ఇన్‌స్టాగ్రామ్‌లో షేర్ చేసిన కొన్ని ఫొటోలు ఈ వార్తలకు మరింత ఊతమిచ్చాయి. ఆ ఫొటోల్లో ప్రియా, రాజ్‌వెల్ రాజ్ సంప్రదాయ దుస్తుల్లో కనిపించారు. మెడలో మల్లెపూల దండలు, చెంపలకు గంధం పూసుకుని ఉన్న ఈ జంట ఫొటోలు సోషల్ మీడియాలో వైరల్ అవుతున్నాయి. ఇవి ప్రీ వెడ్డింగ్ వేడుకలకు సంబంధించినవిగా ప్రచారం జరుగుతున్నప్పటికీ, తమ వివాహంపై ఈ జంట అధికారికంగా ఇంకా స్పందించలేదు.