

రాష్ట్రంలోని ప్రతి అర్హులైన కుటుంబానికి రూ.5 లక్షల జీవిత బీమా భరోసా కల్పించాలనే లక్ష్యంతో తెలంగాణ ప్రభుత్వం చేపట్టిన ఇందిరమ్మ కుటుంబ జీవిత బీమా పథకం నమోదు కార్యక్రమం హైదరాబాద్ జిల్లాలో ప్రారంభమైంది. మంత్రి పొన్నం ప్రభాకర్ ఈ కార్యక్రమాన్ని ప్రారంభించి, అర్హులైన ప్రతి కుటుంబం పథకంలో నమోదు చేసుకోవాలని సూచించారు. ఈ సందర్భంగా ఆయన మాట్లాడుతూ.. దేశంలోనే తొలిసారిగా ప్రతి కుటుంబానికి రూ.5 లక్షల జీవిత బీమా భద్రత కల్పించే లక్ష్యంతో ప్రభుత్వం ఈ పథకాన్ని అమలు చేస్తోందని తెలిపారు. 18 నుంచి 54 ఏళ్ల మధ్య వయస్సు కలిగిన అర్హులైన సంపాదనపరులకు ఈ బీమా వర్తిస్తుందని వెల్లడించారు. కులం, మతం, ఆదాయంతో సంబంధం లేకుండా నిర్దేశిత అర్హతలు కలిగిన వారికి పథకం ప్రయోజనం అందుతుందని పేర్కొన్నారు. బీమా ప్రీమియం మొత్తాన్ని ప్రభుత్వమే చెల్లిస్తుందని, లబ్ధిదారులు ఎలాంటి ప్రీమియం చెల్లించాల్సిన అవసరం లేదని స్పష్టం చేశారు. ఒక కుటుంబంలో ఒకరి కంటే ఎక్కువ మంది సంపాదనపరులు ఉన్నా అర్హతల మేరకు వారందరికీ బీమా సౌకర్యం కల్పిస్తామని, ఒకరు లేదా అంతకంటే ఎక్కువ మంది నామినీలను ఎంపిక చేసుకునే అవకాశం కూడా ఉంటుందని వివరించారు.
ఇందిరమ్మ కుటుంబ జీవిత బీమా పథకం నమోదు ప్రక్రియ నవంబర్ 19 నుంచి డిసెంబర్ 18 వరకు కొనసాగనుంది. నమోదు సమయంలో అర్హులు ఆధార్ కార్డు, రేషన్ కార్డు, మొబైల్ నంబర్, నామినీ వివరాలను సమర్పించాల్సి ఉంటుంది. హైదరాబాద్ జిల్లాలోని వార్డు కార్యాలయాలతో పాటు ప్రత్యేకంగా ఏర్పాటు చేసిన నమోదు శిబిరాల్లో వివరాలను నమోదు చేసుకోవచ్చని అధికారులు తెలిపారు. హైదరాబాద్ జిల్లాలో మొత్తం 8.43 లక్షల ఆహార భద్రత కార్డులు ఉండగా, వాటి పరిధిలో 32.29 లక్షల మంది కుటుంబ సభ్యులు ఉన్నారని వెల్లడించారు. జిల్లాలోని తొమ్మిది సర్కిళ్ల పరిధిలో విస్తృతంగా నమోదు కార్యక్రమాన్ని నిర్వహించేందుకు ఏర్పాట్లు చేసినట్లు తెలిపారు. అర్హులైన ప్రతి కుటుంబం ఈ అవకాశాన్ని సద్వినియోగం చేసుకుని గడువులోగా నమోదు చేసుకోవాలని మంత్రి పొన్నం ప్రభాకర్ కోరారు.
ఈ సందర్భంగా రాష్ట్ర ప్రభుత్వం అమలు చేస్తున్న పలు సంక్షేమ కార్యక్రమాలను కూడా మంత్రి వివరించారు. మహిళలకు ఉచిత బస్సు ప్రయాణ సౌకర్యం, అర్హులైన కుటుంబాలకు 200 యూనిట్ల వరకు ఉచిత విద్యుత్, పేదలకు ఇందిరమ్మ ఇళ్ల మంజూరు వంటి పథకాలను అమలు చేస్తున్నట్లు తెలిపారు. మహిళా స్వయం సహాయక సంఘాలకు ఇప్పటివరకు రూ.79 వేల కోట్ల వడ్డీ లేని రుణాలను పంపిణీ చేసినట్లు పేర్కొన్నారు. ఆరోగ్యశ్రీ వైద్య చికిత్స పరిమితిని రూ.5 లక్షల నుంచి రూ.10 లక్షలకు పెంచినట్లు వివరించారు. ప్రభుత్వ పాఠశాలల్లో మౌలిక వసతుల అభివృద్ధి కోసం రూ.1,000 కోట్లు ఖర్చు చేస్తున్నట్లు తెలిపారు. హైదరాబాద్ నగరంలో ప్రజా రవాణాను మెరుగుపరిచేందుకు బస్సుల సంఖ్యను పెంచడంతో పాటు త్వరలో ఎలక్ట్రిక్ బస్సులను ప్రవేశపెట్టనున్నట్లు వెల్లడించారు. నగరంలోని 150 డివిజన్లు, 15 నియోజకవర్గాల పరిధిలో అర్హులైన ప్రజలకు ప్రభుత్వ సంక్షేమ పథకాలు అందేలా ప్రత్యేక దృష్టి సారిస్తున్నామని, ఇందిరమ్మ కుటుంబ జీవిత బీమా పథకం ద్వారా ప్రతి అర్హులైన కుటుంబానికి ఆర్థిక భద్రత కల్పించడమే ప్రభుత్వ లక్ష్యమని పొన్నం ప్రభాకర్ తెలిపారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!