ఎన్నికల సంఘంలోనే భిన్నాభిప్రాయాలు.. ఎస్‌ఐఆర్‌పై విపక్షాల విమర్శలు

ఓటర్ల జాబితాల ప్రత్యేక సమగ్ర సవరణ (ఎస్‌ఐఆర్‌)పై ఎన్నికల సంఘంలో అంతర్గత విభేదాలు ఉన్నాయంటూ వచ్చిన నివేదిక నేపథ్యంలో విపక్షాలు బుధవారం ఈసీపై విమర్శలు పెంచాయి. ది ఇండియన్‌ ఎక్స్‌ప్రెస్‌ పరిశోధనాత్మక కథనం ప్రకారం.. ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి గత 10 నెలల్లో ఎస్‌ఐఆర్‌కు సంబంధించిన నిర్ణయాలపై కనీసం 14 సార్లు అధికారికంగా అభ్యంతరాలు వ్యక్తం చేశారు.

ఈ అభ్యంతరాలు కొత్త ఓటర్ల నమోదు, ఓటర్ల పేర్ల తొలగింపు, ఓటర్ల జాబితా నిర్వహణకు ఉపయోగించే సాఫ్ట్‌వేర్‌, సవరణ ప్రక్రియలో తీసుకున్న నిర్ణయాలపై అప్పీళ్లకు సంబంధించిన అంశాలను కవర్‌ చేసినట్లు నివేదిక పేర్కొంది. మరోవైపు, ఎస్‌ఐఆర్‌కు సంబంధించిన ఈసీ నిర్ణయాలన్నీ ఏకగ్రీవంగానే తీసుకున్నామని ఈసీ వర్గాలు చెబుతున్నట్లు డెక్కన్‌ క్రానికల్‌ నివేదించింది.