ఈసీ వివాదంపై కాంగ్రెస్‌ నిరసనలకు పిలుపు

కేంద్ర ఎన్నికల సంఘం, ప్రధాన ఎన్నికల కమిషనర్‌ జ్ఞానేశ్‌ కుమార్‌కు సంబంధించిన వివాదం నేపథ్యంలో కాంగ్రెస్‌ దేశవ్యాప్తంగా నిరసనలకు పిలుపునిచ్చింది. ఈ నెల 25న రాష్ట్రాల వారీగా రాష్ట్ర ఎన్నికల సంఘాల కార్యాలయాలకు ర్యాలీలు నిర్వహించాలని పార్టీ రాష్ట్ర శాఖలకు ఆదేశించింది. ఎన్నికల సంఘంలోని సభ్యుల మధ్య భిన్నాభిప్రాయాలు ఉన్నాయంటూ వచ్చిన కథనాల నేపథ్యంలో కాంగ్రెస్‌ ఈ నిరసనలకు పిలుపునిచ్చింది.

ఎన్నికల సంఘం నిర్ణయాలపై ఇద్దరు ఎన్నికల కమిషనర్లు సుఖ్‌బీర్‌ సింగ్‌ సంధు, వివేక్‌ జోషి 10 నెలల వ్యవధిలో కనీసం 14 సార్లు అభ్యంతరాలు వ్యక్తం చేసినట్లు ‘ఇండియన్‌ ఎక్స్‌ప్రెస్‌’ కథనం పేర్కొంది. ఓటర్ల జాబితా నిర్వహణ, ఫారం-6 మార్పులు, ఓటర్ల పేర్ల తొలగింపు, ఎన్నికల సమాచార వ్యవస్థకు సంబంధించిన అంశాలపై అభ్యంతరాలు వ్యక్తమైనట్లు తెలిపింది. అయితే ఎన్నికల సంఘం మాత్రం సభ్యుల మధ్య భిన్నాభిప్రాయాలు సంస్థాగత చర్చల్లో సాధారణమేనని, తుది నిర్ణయాలన్నీ ఏకగ్రీవంగానే తీసుకున్నామని స్పష్టం చేసింది.

ఈ నేపథ్యంలో ఈ నెల 29న ఢిల్లీలో కాంగ్రెస్‌ వర్కింగ్‌ కమిటీ సమావేశం జరగనుంది. ఎన్నికల సంఘం వివాదం, ప్రత్యేక ఓటర్ల జాబితా సవరణ అంశం, పార్టీ తదుపరి కార్యాచరణపై ఈ సమావేశంలో చర్చించే అవకాశం ఉంది. ఎన్నికల సంఘం పనితీరుపై కొనసాగుతున్న రాజకీయ వివాదం నేపథ్యంలో ఈ భేటీ ప్రాధాన్యం సంతరించుకుంది.