రాహుల్ గాంధీతో మహేశ్ కుమార్ గౌడ్ భేటీ

తెలంగాణ పీసీసీ అధ్యక్షుడు మహేశ్ కుమార్ గౌడ్ కాంగ్రెస్ అగ్రనేత రాహుల్ గాంధీని కలిశారు. నవంబర్ 13, 14 తేదీల్లో హైదరాబాద్‌లో జరగనున్న భారత్ సమ్మిట్‌కు ఆయనను ఆహ్వానించారు. ఈ సందర్భంగా దేశవ్యాప్తంగా, ముఖ్యంగా తెలంగాణలో ఓబీసీలకు తగిన రాజకీయ ప్రాతినిధ్యం కల్పించాల్సిన అవసరంపై రాహుల్ గాంధీతో చర్చించినట్లు మహేశ్ కుమార్ గౌడ్ తెలిపారు. వెనుకబడిన తరగతులకు రాజకీయాల్లో మరింత ప్రాధాన్యత ఇవ్వాలని వివరించినట్లు పేర్కొన్నారు. అలాగే తెలంగాణలో బూత్ స్థాయి నుంచి రాష్ట్ర స్థాయి వరకు కాంగ్రెస్ పార్టీ చేపడుతున్న సంస్థాగత కార్యక్రమాల గురించి వివరించినట్లు వెల్లడించారు.

భారత్ సమ్మిట్‌తో పాటు గిగ్ వర్కర్ల కోసం ప్రత్యేక సమావేశం నిర్వహించాలని రాహుల్ గాంధీ సూచించినట్లు మహేశ్ కుమార్ గౌడ్ తెలిపారు. తెలంగాణ ప్రభుత్వం గిగ్ వర్కర్ల కోసం ప్రత్యేక చట్టం తీసుకొచ్చిన నేపథ్యంలో వారితో సమావేశం ఏర్పాటు చేయాలని నిర్ణయించినట్లు పేర్కొన్నారు. హైదరాబాద్‌లో ఎస్‌ఐఆర్‌కు వ్యతిరేకంగా నిర్వహించనున్న సభ, తెలంగాణలో మెగా బీసీ ర్యాలీ నిర్వహణ అంశాలను కూడా రాహుల్ గాంధీ దృష్టికి తీసుకెళ్లినట్లు చెప్పారు. అయితే మంత్రులు, ఎంపీల మధ్య విభేదాలు, ఢిల్లీలో చోటుచేసుకున్న పరిణామాలపై ఈ సమావేశంలో చర్చ జరగలేదని స్పష్టం చేశారు. ఆ అంశాలను పార్టీ ఇన్‌ఛార్జ్ ప్రధాన కార్యదర్శి కేసీ వేణుగోపాల్ చూసుకుంటారని తెలిపారు. నవంబర్ చివరి నాటికి తెలంగాణలో నామినేటెడ్ పోస్టుల భర్తీ పూర్తవుతుందని వెల్లడించారు. మరోవైపు, సోనియా గాంధీ జీవిత విశేషాలతో వెలువడిన పుస్తకాన్ని స్వాగతించిన ఆయన, దానిపై తెలంగాణలో ప్రత్యేక కార్యక్రమం నిర్వహిస్తామని చెప్పారు.