తనపై కేసు కొట్టివేయాలంటూ హైకోర్టును ఆశ్రయించిన జగన్

ఆంధ్రప్రదేశ్ మాజీ ముఖ్యమంత్రి, వైఎస్సార్‌సీపీ అధినేత వైఎస్ జగన్‌మోహన్‌రెడ్డి ఏపీ హైకోర్టును ఆశ్రయించారు. పులివెందులలో తనపై నమోదైన కేసును కొట్టివేయాలని కోరుతూ క్వాష్ పిటిషన్ దాఖలు చేశారు. ఎన్నికల కోడ్‌ను ఉల్లంఘించి నిరసన కార్యక్రమంలో పాల్గొన్నారనే ఆరోపణలతో జగన్‌పై కేసు నమోదైన నేపథ్యంలో ఆయన న్యాయస్థానాన్ని ఆశ్రయించారు.

ఈ పిటిషన్‌పై ఏపీ హైకోర్టు నేడు విచారణ చేపట్టనుంది. కేసు నమోదు చేయడానికి గల కారణాలు, పిటిషనర్ తరఫు వాదనలు, పోలీసుల అభిప్రాయాలను విచారణ సందర్భంగా న్యాయస్థానం పరిశీలించనుంది. ఈ కేసులో హైకోర్టు ఎలాంటి నిర్ణయం తీసుకుంటుందనేది ఆసక్తికరంగా మారింది.