హైదరాబాద్ జీఎస్ఐలో మూడు కీలక వసతులను ప్రారంభించనున్న కిషన్‌రెడ్డి

హైదరాబాద్‌లోని బండ్లగూడ-నాగోల్‌లో ఉన్న జియోలాజికల్ సర్వే ఆఫ్ ఇండియా ట్రైనింగ్ ఇన్‌స్టిట్యూట్ (జీఎస్ఐటీఐ)లో మూడు కీలక వసతులను కేంద్ర బొగ్గు, గనుల శాఖ మంత్రి జి. కిషన్‌రెడ్డి నవంబర్ 10న ఉదయం 9.30 గంటలకు ప్రారంభించనున్నారు. ఖనిజ వనరుల అన్వేషణ, భూవిజ్ఞాన పరిశోధనలు, అంతర్జాతీయ శిక్షణ, డిజిటల్ విద్యా రంగాల్లో జీఎస్ఐ సామర్థ్యాలను పెంపొందించడం ఈ వసతుల ప్రధాన లక్ష్యం. తొలుత అంతర్జాతీయ వసతి గృహాన్ని, అనంతరం జియోఫిజికల్ డేటా ప్రాసెసింగ్ ల్యాబొరేటరీ, డిజిటల్ స్టూడియోలను మంత్రి ప్రారంభిస్తారు. జీఎస్ఐ డైరెక్టర్ జనరల్ దినేష్ వి. గన్వీర్ స్వాగతోపన్యాసం చేయనుండగా, మల్కాజిగిరి ఎంపీ ఈటల రాజేందర్, కేంద్ర గనుల మంత్రిత్వ శాఖ సంయుక్త కార్యదర్శి ఫరీదా ఎం. నాయక్ తదితరులు పాల్గొననున్నారు.

రూ.4.27 కోట్లతో నిర్మించిన అంతర్జాతీయ వసతి గృహానికి నలంద, తక్షశిల అని పేర్లు పెట్టారు. ఇందులో 32 పూర్తిస్థాయి ఫర్నీచర్‌తో కూడిన సూట్లతో పాటు భోజనశాల, వ్యాయామశాల, వినోద సదుపాయాలు, మినీ లైబ్రరీ, లాండ్రీ సౌకర్యాలు ఉన్నాయి. ఎన్ఎంఈడీటీ, జీఎస్ఐ సంయుక్తంగా రూ.4.55 కోట్లతో ఏర్పాటు చేసిన అధునాతన జియోఫిజికల్ డేటా ప్రాసెసింగ్ ల్యాబ్‌లో 25 అత్యాధునిక కంప్యూటర్లు, ఆధునిక సాఫ్ట్‌వేర్ అందుబాటులో ఉన్నాయి. వీటి ద్వారా భూభౌతిక సమాచార విశ్లేషణ, డేటా ప్రాసెసింగ్, మోడలింగ్ వంటి ప్రక్రియలకు మద్దతు లభించనుంది. సీబీసీ, జీఎస్ఐ కలిసి రూ.30 లక్షలతో ఏర్పాటు చేసిన డిజిటల్ స్టూడియోలో మిషన్ కర్మయోగిలో భాగంగా ఐజీవోటీ కర్మయోగి పోర్టల్ కోసం వీడియో పాఠాలు, పాడ్‌కాస్ట్‌లు, వెబినార్లు రూపొందించనున్నారు. 1851లో ఏర్పాటైన జీఎస్ఐ ప్రస్తుతం భౌగోళిక సర్వేలు, ఖనిజాన్వేషణ, ప్రకృతి విపత్తులపై పరిశోధనలు, ఖనిజ వనరుల అంచనా వంటి కీలక కార్యకలాపాలను నిర్వహిస్తోంది.