లండన్‌లో అంబేడ్కర్ హౌస్‌ను సందర్శించిన సీఎం రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి, మంత్రి శ్రీధర్ బాబుతో కలిసి లండన్‌లోని ప్రముఖ అంబేడ్కర్ హౌస్‌ను సందర్శించారు. డాక్టర్ బి.ఆర్. అంబేడ్కర్ 1921-22లో నివసించిన ప్రిమ్‌రోజ్ ప్రాంతంలోని 10 కింగ్ హెన్రీ’స్ రోడ్‌లోని ఈ ఇంటిని సీఎం పరిశీలించారు. ప్రస్తుతం అంబేడ్కర్ ఆశయాలకు అంకితమైన మ్యూజియంగా కొనసాగుతున్న ఈ ప్రదేశంలో రాజ్యాంగబద్ధత, సమానత్వం, కుల వివక్ష నిర్మూలన, అణచివేత లేని సమాజం, సామాజిక న్యాయం వంటి ఆయన సిద్ధాంతాలను ప్రతిబింబించే అంశాలను సీఎం రేవంత్ రెడ్డి పరిశీలించారు. సందర్శకుల డైరీలో తన అనుభూతిని నమోదు చేస్తూ.. అంబేడ్కర్ హౌస్‌ను సందర్శించడం ఆధ్యాత్మిక క్షేత్రాన్ని సందర్శించినట్లుగా ఉందని, సామాజిక న్యాయం కోసం మరింత అంకితభావంతో పనిచేయాలన్న స్ఫూర్తి కలిగిందని పేర్కొన్నారు.

దాదాపు గంటపాటు సాగిన పర్యటనలో అంబేడ్కర్ మ్యూజియం ఏర్పాటులో కీలక పాత్ర పోషించిన యాంటీ కాస్ట్ డిస్క్రిమినేషన్ అలయన్స్ చైర్ సంతోష్ దాస్ ఎంబీఈ, యూకేలో అంబేడ్కర్ జీవితానికి సంబంధించిన పలు విషయాలను ముఖ్యమంత్రికి వివరించారు. పర్యటన అనంతరం సీఎం రేవంత్ రెడ్డి మాట్లాడుతూ.. తన జీవితంలో ఇది గొప్ప క్షణాల్లో ఒకటని అన్నారు. డాక్టర్ అంబేడ్కర్ జీవితంలోని వ్యక్తిగత కోణాన్ని తెలుసుకోవడంతో పాటు ఆయనకు సంబంధించిన వస్తువులను చూడటం, తాకడం ఎంతో గొప్ప అనుభూతిని కలిగించిందని తెలిపారు.