బిహార్‌లో విషాదం.. హెలికాప్టర్ నుంచి పడిన ఆహార ప్యాకెట్ తగిలి వ్యక్తి మృతి

బిహార్‌లో వరద బాధితులకు సహాయం అందించే సమయంలో విషాద ఘటన చోటుచేసుకుంది. సారణ్ జిల్లాలోని అమ్నౌర్ పోలీస్‌స్టేషన్ పరిధిలో ఉన్న పరశురాంపూర్ గ్రామంలో శుక్రవారం మధ్యాహ్నం ఈ ఘటన జరిగింది. వరదలతో ఇబ్బందులు పడుతున్న ప్రజలు సహాయ శిబిరాల వద్దకు చేరుకోగా, వారికి హెలికాప్టర్ ద్వారా ఆహార పదార్థాలను అందించే ఏర్పాట్లు చేశారు. ఈ క్రమంలో హెలికాప్టర్ నుంచి కిందకు వదిలిన ఆహార ప్యాకెట్ 58 ఏళ్ల అనిల్ కుమార్ సింగ్‌పై పడింది. తలకు తీవ్ర గాయం కావడంతో ఆయన అక్కడికక్కడే మృతి చెందినట్లు అధికారులు తెలిపారు.

ఇదే ప్రాంతంలో హెలికాప్టర్ తక్కువ ఎత్తులో ప్రయాణించడంతో మరో ప్రమాదం జరిగింది. హెలికాప్టర్ నుంచి వచ్చిన బలమైన గాలుల కారణంగా ఓ ఇనుప రేకు ఎగిరి వెళ్లి ఓ మహిళను ఢీకొట్టింది. దీంతో ఆమెకు గాయాలు కావడంతో వెంటనే ఆసుపత్రికి తరలించి చికిత్స అందించారు. ప్రస్తుతం ఆమె పరిస్థితి నిలకడగా ఉందని అధికారులు వెల్లడించారు. బిహార్‌లోని పలు ప్రాంతాలు వరదలతో తీవ్రంగా ప్రభావితమవుతున్న నేపథ్యంలో బాధితులకు ఆహారం, ఇతర అత్యవసర సామగ్రిని అందించేందుకు సహాయక చర్యలు కొనసాగుతున్నాయి.