ఏపీ డీఎస్సీ 2026 నోటిఫికేషన్‌ అప్‌డేట్...

ఆంధ్రప్రదేశ్‌లో మరో డీఎస్సీ నోటిఫికేషన్‌కు ప్రభుత్వం కసరత్తు చేస్తోంది. రాష్ట్ర ఉద్యోగ నియామక క్యాలెండర్‌లో భాగంగా 2026 డీఎస్సీ నోటిఫికేషన్‌ను అక్టోబర్‌ 15న విడుదల చేసేలా ప్రణాళిక రూపొందించినట్లు నివేదికలు చెబుతున్నాయి. పాఠశాల విద్యాశాఖ ఇప్పటికే టీచర్‌ ఖాళీల వివరాలను సేకరించి ప్రాథమిక ప్రతిపాదనలు సిద్ధం చేసినట్లు సమాచారం. ఈసారి 2,500కు పైగా టీచర్‌ పోస్టులు భర్తీ చేసే అవకాశం ఉంది. ప్రభుత్వ, మండల పరిషత్‌, జిల్లా పరిషత్‌, పురపాలక పాఠశాలల్లోనే సుమారు 2,250 ఖాళీలు ఉండొచ్చని అంచనా. సాంఘిక సంక్షేమం, బీసీ సంక్షేమం, గిరిజన గురుకులాలు, ఏపీ రెసిడెన్షియల్‌, దివ్యాంగ సంక్షేమం, ఆదర్శ పాఠశాలల్లోనూ అదనపు పోస్టులు ఉండనున్నాయి. అయితే తుది పోస్టుల సంఖ్య అధికారిక నోటిఫికేషన్‌ ద్వారా స్పష్టమవుతుంది.

డీఎస్సీ పోస్టులతో పాటు ఏపీపీఎస్సీ ద్వారా భర్తీ చేయనున్న డైట్‌, ఎస్‌సీఈఆర్టీ లెక్చరర్లు, జూనియర్‌ లెక్చరర్లు, లైబ్రేరియన్ల పోస్టులు కూడా నియామక ప్రణాళికలో ఉన్నాయి. 2029 వరకు ప్రతి ఏడాది డీఎస్సీ నిర్వహించేలా ముందస్తు ప్రణాళిక రూపొందిస్తున్నట్లు సమాచారం. అక్టోబర్‌ 15న విడుదలయ్యే అధికారిక నోటిఫికేషన్‌లో పోస్టుల వారీగా ఖాళీలు, అర్హతలు, దరఖాస్తు తేదీలు, పరీక్ష విధానం, పరీక్ష తేదీలపై పూర్తి వివరాలు వెల్లడయ్యే అవకాశం ఉంది. అభ్యర్థులు అధికారిక నోటిఫికేషన్‌ కోసం ఎదురుచూడాల్సి ఉంటుంది.