మోదీ ప్రజా ప్రస్థానంపై ఏపీ కేబినెట్ ప్రశంసలు.. ప్రత్యేక తీర్మానం!

ప్రధాని నరేంద్ర మోదీ 25 ఏళ్ల ప్రజా ప్రస్థానాన్ని పూర్తి చేసుకున్న సందర్భంగా ఆంధ్రప్రదేశ్ కేబినెట్ ప్రత్యేక అభినందన తీర్మానాన్ని ఆమోదించింది. అమరావతిలో జరిగిన కేబినెట్ సమావేశంలో ఈ తీర్మానాన్ని ప్రవేశపెట్టగా, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్, ఇతర మంత్రులు మోదీ నాయకత్వాన్ని ప్రశంసించారు. రెండు పేజీల తీర్మానాన్ని మంత్రి నారా లోకేశ్ చదివి వినిపించినట్లు సమాచారం.

మౌలిక వసతులు, సాంకేతికత, సంక్షేమం, ఆవిష్కరణలు, సమర్థవంతమైన పాలనకు మోదీ ప్రాధాన్యం ఇచ్చారని ఏపీ కేబినెట్ పేర్కొంది. ప్రపంచ వేదికపై భారత్ ప్రతిష్ఠను పెంచడంతో పాటు రాష్ట్రాలను భాగస్వాములుగా చేసుకుని సహకార సమాఖ్య స్ఫూర్తితో అభివృద్ధి దిశగా దేశాన్ని ముందుకు తీసుకెళ్తున్నారని తీర్మానంలో ప్రశంసించినట్లు తెలుస్తోంది. మోదీ 25 ఏళ్ల సేవా ప్రస్థానానికి సీఎం చంద్రబాబు అభినందనలు తెలిపి, భవిష్యత్తులోనూ మరిన్ని విజయాలు సాధించాలని ఆకాంక్షించారు.