అరసవల్లి సూర్యదేవుడికి ఘనమైన కానుక..

శ్రీకాకుళం జిల్లా అరసవల్లిలోని ప్రసిద్ధ శ్రీ సూర్యనారాయణ స్వామివారి ఆలయంలో భక్తి వైభవం వెల్లివిరిసింది. హైదరాబాద్‌కు చెందిన ఓ అజ్ఞాత భక్తుడు సుమారు రూ.2 కోట్ల విలువైన ఆభరణాలను స్వామివారికి సమర్పించారు. స్వామివారి అలంకరణ కోసం ప్రత్యేకంగా తయారు చేసిన ఈ ఆభరణాల్లో రాగి మకర తోరణం, వెండి కిరీటం, కవచం, కేయూరాలు, వాణీ చెంగులు, స్వామివారి పాదాలు, సనక-సనందన కవచాలు, మాథర, పింగళ కవచాలు, అశ్వపీఠం తదితరాలు ఉన్నాయి. వీటికి బంగారు తాపడం చేయించి ఆకర్షణీయంగా తీర్చిదిద్దినట్లు ఆలయ వర్గాలు తెలిపారు.

స్వామివారి పరివార దేవతలైన ఉషా, ఛాయా, పద్మినీ అమ్మవార్ల ఉత్సవమూర్తుల కోసం కూడా ప్రత్యేక కవచాలు, హస్తాలు తదితర ఆభరణాలను భక్తుడు సమర్పించారు. మంగళవారం ప్రత్యేక పూజల అనంతరం సూర్యనారాయణ స్వామివారిని నూతన ఆభరణాలతో అలంకరించారు. ఈ దివ్య అలంకరణను దర్శించిన భక్తులు ఆధ్యాత్మికానందానికి లోనయ్యారు. తమ పేరు, వివరాలను వెల్లడించకుండా ఇంత విలువైన ఆభరణాలను సమర్పించిన అజ్ఞాత భక్తుడి భక్తి ఆలయ వర్గాల్లో ప్రత్యేకంగా చర్చనీయాంశమైంది.