11 ఏళ్లలో భారీ రుణ రైటాఫ్‌లు… కేంద్రం కీలక సమాచారం

గత 11 ఆర్థిక సంవత్సరాల్లో బ్యాంకులు మొత్తం రూ.9.75 లక్షల కోట్ల విలువైన రుణాలను సాంకేతికంగా రద్దు (రైటాఫ్‌) చేసినట్లు ఆర్థిక సహాయ మంత్రి పంకజ్ చౌధరీ వెల్లడించారు. లోక్‌సభకు ఇచ్చిన లిఖితపూర్వక సమాధానంలో ఆయన వివరించిన దాని ప్రకారం, 2019-20 ఆర్థిక సంవత్సరంలో అత్యధికంగా రూ.1.59 లక్షల కోట్ల రుణాలు రైటాఫ్‌ చేయబడ్డాయి. అనంతరం ఈ సంఖ్య క్రమంగా తగ్గుతూ 2024-25 నాటికి రూ.47,568 కోట్లకు పరిమితమైంది. అలాగే 2014-15లో రూ.31,723 కోట్లు, 2015-16లో రూ.40,416 కోట్లు, 2016-17లో రూ.68,308 కోట్లు, 2017-18లో రూ.99,132 కోట్ల రుణాలను బ్యాంకులు రద్దు చేసినట్లు ఆయన తెలిపారు.

ఇదిలా ఉండగా, దేశంలో అగ్రగామి ఉద్దేశపూర్వక రుణ ఎగవేతదారుల వివరాలను కూడా ప్రభుత్వం వెల్లడించింది. 2025 మార్చి 31 నాటికి టాప్‌ 10 ఎగవేతదారులు కలిపి బ్యాంకులకు రూ.40,635 కోట్లకు పైగా బకాయిలు ఉన్నట్లు ఆర్థిక మంత్రి నిర్మలా సీతారామన్ లోక్‌సభకు తెలిపారు. ఇందులో ఏబీజీ షిప్‌యార్డ్‌ రూ.6,695 కోట్ల బకాయితో మొదటి స్థానంలో నిలిచింది.

ఇతర ప్రధాన ఎగవేతదారులలో గీతాంజలి జెమ్స్‌ రూ.6,236 కోట్లు, బీటా నాప్తాల్‌ రూ.5,268 కోట్లు, రాకేశ్ కుమార్ కుల్దీప్ సింగ్ వాధ్వాన్ రూ.4,291 కోట్లు, భూషణ్ స్టీల్ పవర్ అండ్ స్టీల్ డైరెక్టర్లు రూ.3,810 కోట్లు, రాజా టెక్స్‌టైల్స్ రూ.3,260 కోట్లు, గిల్ట్ ప్యాక్ రూ.3,080 కోట్లు, ర్యాంక్ ఇండస్ట్రీస్ రూ.2,655 కోట్లు, హౌసింగ్ డెవలప్‌మెంట్ అండ్ ఇన్‌ఫ్రా రూ.2,540 కోట్ల బకాయిలతో జాబితాలో ఉన్నాయి. మొత్తంగా బ్యాంకింగ్ వ్యవస్థలో రుణ రద్దులు, ఎగవేతలు కీలక చర్చనీయాంశాలుగా మారుతున్నాయి.