దేశీయ స్టాక్ మార్కెట్లు ఈ రోజు భారీ నష్టాలతో ప్రారంభమయ్యాయి. అంతర్జాతీయ మార్కెట్ల నుంచి వచ్చిన ప్రతికూల సంకేతాలు, కృత్రిమ మేధ (AI) రంగానికి సంబంధించిన ఆందోళనలు దేశీయ సూచీలపై ప్రతికూల ప్రభావం చూపించాయి. ఇప్పటికే నిన్న నష్టాలను నమోదు చేసిన మార్కెట్లు, నేటి ట్రేడింగ్లో కూడా అదే ధోరణిని కొనసాగించాయి. ముఖ్యంగా ఐటీ షేర్లు తీవ్ర ఒత్తిడిని ఎదుర్కొంటూ గణనీయంగా పతనమయ్యాయి.
ఉదయం 9.33 గంటల సమయంలో సెన్సెక్స్ 760 పాయింట్లు పడిపోయి 82,906 వద్ద ట్రేడవుతుండగా, నిఫ్టీ 245 పాయింట్లు కోల్పోయి 25,561 స్థాయిలో కదలాడుతోంది. డాలర్తో పోలిస్తే రూపాయి విలువ 8 పైసలు తగ్గి 90.69గా నమోదైంది. నిఫ్టీ సూచీలో ఎస్బీఐ లైఫ్ ఇన్సూరెన్స్, బజాజ్ ఫైనాన్స్, యాక్సిస్ బ్యాంక్, ఎస్బీఐ, హెచ్డీఎఫ్సీ లైఫ్ షేర్లు లాభాల్లో ఉండగా, ఇన్ఫోసిస్, టీసీఎస్, హిందాల్కో, హెచ్సీఎల్ టెక్నాలజీస్, విప్రో షేర్లు నష్టాల్లో ట్రేడవుతున్నాయి.
నిన్న అమెరికా మార్కెట్లు కూడా నష్టాల్లో ముగిశాయి. కృత్రిమ మేధ రంగంపై పెరిగిన ఆందోళనల కారణంగా మదుపర్లు అమ్మకాల వైపు మొగ్గుచూపడంతో నాస్డాక్ సూచీ సుమారు 2 శాతం పడిపోయింది. తాజాగా విడుదలైన ఉద్యోగ గణాంకాలు, జనవరి ద్రవ్యోల్బణ నివేదిక విడుదలకు ముందస్తు జాగ్రత్తల నేపథ్యంలో మదుపర్లు అప్రమత్తంగా వ్యవహరించారు. అమెరికాలో వడ్డీ రేట్ల తగ్గింపుపై స్పష్టత లేకపోవడం కూడా ప్రభావం చూపింది. వడ్డీ రేట్లు తగ్గకపోతే అమెరికన్ కంపెనీలు వ్యయాలను తగ్గించే అవకాశం ఉంది, దీని ప్రభావం భారత ఐటీ కంపెనీల ఆర్డర్లపై పడవచ్చు. ఈ పరిణామాల నేపథ్యంలో ఐటీ షేర్లు వరుసగా మూడో సెషన్లో కలిపి సుమారు 5.5 శాతం మేర క్షీణించాయి. ఇదే సమయంలో ఆసియా మార్కెట్లు కూడా నష్టాల్లో ట్రేడవుతున్నాయి.
కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!