మైక్రోసాఫ్ట్ సర్వీసులు నిలిచిపోవడంతో ఆఫీసు పనులకు బ్రేక్.. అసలు కారణం ఇదే!

ప్రముఖ టెక్నాలజీ సంస్థ మైక్రోసాఫ్ట్ సేవల్లో శుక్రవారం (నవంబర్ 13) తీవ్ర సాంకేతిక అంతరాయం ఏర్పడింది. ప్రపంచవ్యాప్తంగా లక్షలాది మంది వినియోగదారులు, కార్పొరేట్ ఉద్యోగులు ఈ సమస్యతో ఇబ్బందులు ఎదుర్కొన్నారు. మైక్రోసాఫ్ట్ 365, అవుట్‌లుక్, టీమ్స్, కోపైలట్ వంటి కీలక సేవలు ఏడు గంటలకు పైగా నిలిచిపోయాయి. ముఖ్యంగా డౌన్‌డిటెక్టర్‌లో అవుట్‌లుక్ సేవలపై 1.38 లక్షలకు పైగా ఫిర్యాదులు నమోదయ్యాయి. ఇమెయిల్స్ పంపడం, కీలకమైన ఫైళ్లను యాక్సెస్ చేయడం, ఆన్‌లైన్ సమావేశాలను నిర్వహించడం సాధ్యం కాకపోవడంతో పలు సంస్థల్లో రోజువారీ కార్యకలాపాలకు ఆటంకం ఏర్పడింది.

ఈ అంతరాయం మైక్రోసాఫ్ట్ 365 కనెక్టర్లపై ఆధారపడే ఓపెన్‌ఏఐ, ఆంత్రోపిక్ వంటి ఏఐ సంస్థల సేవలపైనా ప్రభావం చూపింది. సర్వర్ల సంఖ్య తగ్గడం వల్ల సురక్షిత కనెక్షన్ల ఏర్పాటుపై అదనపు భారం పడటంతో సమస్య తలెత్తినట్లు మైక్రోసాఫ్ట్ వెల్లడించింది. మరోవైపు, ఈ సాంకేతిక లోపం కారణంగా అమెరికాకు చెందిన ఎలక్ట్రిక్ ట్రక్కుల తయారీ సంస్థ వర్క్‌హార్స్ గ్రూప్ తన ఆర్థిక ఫలితాల ప్రకటనను నవంబర్ 16కు వాయిదా వేసుకుంది. ప్రభావిత సర్వర్లను పునఃప్రారంభించడంతో పాటు కొన్ని ప్రాంతాల్లో ట్రాఫిక్ నియంత్రణ చర్యలు చేపట్టి సేవలను క్రమంగా పునరుద్ధరిస్తున్నట్లు మైక్రోసాఫ్ట్ తెలిపింది. ఇటీవల అజూర్ క్లౌడ్ సేవల్లోనూ అంతరాయం ఏర్పడిన నేపథ్యంలో కంపెనీ క్లౌడ్ సేవల విశ్వసనీయతపై మరోసారి చర్చ మొదలైంది.