గూగుల్ సెర్చ్‌లోకి మరో శక్తివంతమైన ఏఐ మోడల్

గూగుల్ తన తాజా ఏఐ మోడల్ జెమినీ 4 కార్బన్‌ను విడుదల చేసింది. సైబర్ సెక్యూరిటీ, సుదీర్ఘ ఏజెంటిక్ వర్క్‌ఫ్లోలు, సాఫ్ట్‌వేర్ ఇంజినీరింగ్, శాస్త్రీయ విశ్లేషణతో పాటు సంక్లిష్టమైన సమాచార ఆధారిత పనుల్లో అధునాతన సామర్థ్యాలు కలిగిన తమ అత్యంత శక్తివంతమైన మోడల్‌గా సంస్థ దీనిని అభివర్ణించింది. ఈ మోడల్‌ను గూగుల్ సెర్చ్‌లోని ఏఐ మోడ్ ద్వారా కూడా అందుబాటులోకి తీసుకొస్తోంది. తొలుత గూగుల్ ఏఐ అల్ట్రా సబ్‌స్క్రైబర్లకు ఈ సదుపాయం కల్పిస్తోంది. క్లిష్టమైన ప్రశ్నలను మరింత లోతుగా విశ్లేషించడం, యూజర్ల సూచనలను మెరుగ్గా అర్థం చేసుకోవడం, ఉపయోగకరమైన సమాధానాలు ఇవ్వడం దీని ప్రత్యేకతలని గూగుల్ తెలిపింది.

జెమినీ 4 కార్బన్‌ను గూగుల్ ఏఐ అల్ట్రా సబ్‌స్క్రైబర్లకు గూగుల్ యాంటీగ్రావిటీ, జెమినీ యాప్, సెర్చ్‌లోని ఏఐ మోడ్ ద్వారా అందుబాటులోకి తీసుకొస్తున్నట్లు సంస్థ ప్రకటించింది. అర్హత కలిగిన సబ్‌స్క్రైబర్లు గూగుల్ సెర్చ్‌లోని ఏఐ మోడ్ సెలెక్టర్‌లో ఈ మోడల్‌ను ఎంపిక చేసుకోవచ్చు. గూగుల్ ప్రతినిధులు రాబీ స్టెయిన్, రాజన్ పటేల్ కూడా ఎక్స్ వేదికగా ఈ విషయాన్ని వెల్లడించారు. జెమినీ 4 కార్బన్‌లో లోతైన విశ్లేషణ సామర్థ్యం, సూచనలను మరింత కచ్చితంగా అనుసరించే లక్షణాలు మెరుగుపడ్డాయని రాబీ స్టెయిన్ పేర్కొన్నారు. యూజర్ల ఉద్దేశాన్ని మెరుగ్గా అర్థం చేసుకుని, ఏఐ మోడ్‌లో మరింత లోతైన సంభాషణలకు ఈ మోడల్ సహకరిస్తుందని రాజన్ పటేల్ తెలిపారు.

ఈ మోడల్‌ను ముందుగానే పరీక్షించిన వారు కూడా సానుకూల అభిప్రాయాలు వ్యక్తం చేస్తున్నారు. జెమినీ యాప్ ఎర్లీ యాక్సెస్ ప్రోగ్రామ్‌లో భాగంగా దీనిని పరీక్షించిన గ్లెన్ గేబ్, జెమినీ 4 కార్బన్ అత్యంత శక్తివంతమైన మోడల్ అని ప్రశంసించారు. కేవలం ఒక ప్రాంప్ట్‌తో అటారీ 2600 గేమ్ పిట్‌ఫాల్కు కొత్త వెర్షన్‌ను రూపొందించానని, కొన్ని నిమిషాల్లోనే ఆ పని పూర్తయిందని ఆయన ఎక్స్‌లో పేర్కొన్నారు. తక్కువ యూజర్ ఇన్‌పుట్‌తో సంక్లిష్టమైన పనులను పూర్తి చేయగల ఏఐ మోడళ్ల అభివృద్ధిపై గూగుల్ దృష్టి పెడుతున్న విషయాన్ని ఈ పరిణామం సూచిస్తోంది. ఏఐ అల్ట్రా సబ్‌స్క్రైబర్లతో పాటు చెల్లింపు API వినియోగదారులకు కూడా ఈ మోడల్‌ను అందిస్తున్నట్లు అందిన సమాచారం పేర్కొంటోంది.