అధునాతన రీజనింగ్, సైబర్‌ సెక్యూరిటీ సామర్థ్యాలతో గూగుల్‌ కొత్త AI మోడల్‌ ‘జెమినీ 4 ఆర్గాన్‌’

సంక్లిష్టమైన పనులను లోతుగా విశ్లేషించి పూర్తి చేసే లక్ష్యంతో గూగుల్‌ ‘జెమినీ 4 ఆర్గాన్‌’ పేరుతో కొత్త ఫ్రాంటియర్‌ ఆర్టిఫిషియల్‌ ఇంటెలిజెన్స్‌ మోడల్‌ను పరిచయం చేసింది. కోడింగ్‌, తార్కిక విశ్లేషణ, మల్టీమోడల్‌ సామర్థ్యాలతో పాటు ఫైనాన్స్‌, న్యాయ రంగాల్లోని క్లిష్టమైన పనులకు ఇది ఉపయోగపడుతుందని కంపెనీ తెలిపింది. సాఫ్ట్‌వేర్‌లోని భద్రతా లోపాలను గుర్తించడం, ధ్రువీకరించడం, సరిచేయడం కూడా ఈ మోడల్‌ ప్రత్యేకతలుగా పేర్కొంది. ప్రపంచవ్యాప్తంగా ఆసుపత్రులు ఉపయోగించే ఓ హెల్త్‌కేర్‌ సాఫ్ట్‌వేర్‌లో వ్యక్తిగత సమాచారాన్ని ప్రమాదంలో పడేసే భద్రతా లోపాన్ని ఆర్గాన్‌ గుర్తించినట్లు గూగుల్‌ వెల్లడించింది. దీని సైబర్‌ సెక్యూరిటీ సామర్థ్యాల దృష్ట్యా ప్రస్తుతం ఫెయిర్‌విండ్‌ ప్రోగ్రామ్‌లోని విశ్వసనీయ సైబర్‌ భద్రతా నిపుణులకే పరిమితంగా అందుబాటులో ఉంచింది.

జెమినీ 4 ఆర్గాన్‌ అవుట్‌పుట్‌ పరిమితిని గతంలో ఉన్న 64,000 టోకెన్ల నుంచి ఒక మిలియన్‌ టోకెన్లకు పెంచినట్లు గూగుల్‌ తెలిపింది. దీంతో దీర్ఘమైన, క్లిష్టమైన పనులను మరింత లోతుగా విశ్లేషించి పూర్తి చేసే అవకాశం ఉంటుంది. కోడ్‌లోని లోపాల సవరణ, పెద్ద కోడ్‌బేస్‌ల మార్పులు, అల్గారిథమ్‌ల రూపకల్పనలో తమ ఇంజినీర్లు ఈ మోడల్‌ను ఉపయోగిస్తున్నారని కంపెనీ పేర్కొంది. క్వాంటమ్‌ కంప్యూటింగ్‌, డేటా సెంటర్లలో మెమరీ వినియోగాన్ని మెరుగుపరచడం వంటి రంగాల్లోనూ దీని సామర్థ్యాలను పరీక్షిస్తున్నారు. సాఫ్ట్‌వేర్‌ ఇంజినీరింగ్‌, ఆర్థిక పరిశోధన, న్యాయపరమైన పనులు, బిజినెస్‌ ఆటోమేషన్‌, వీడియో విశ్లేషణ వంటి బెంచ్‌మార్క్‌లలో మెరుగైన ఫలితాలు సాధించినట్లు గూగుల్‌ వెల్లడించింది. దుర్వినియోగాన్ని అడ్డుకునేందుకు ప్రత్యేక భద్రతా నియంత్రణలను రూపొందించింది. తొలుత ఎంపిక చేసిన సైబర్‌ భద్రతా నిపుణులకు అందించి, అనంతరం అర్హులైన చెల్లింపు API వినియోగదారులు, Google AI Ultra సబ్‌స్క్రైబర్లకు దశలవారీగా అందుబాటులోకి తీసుకురావాలని భావిస్తోంది.