జనవరి 9 నుండి wpl 2026 : బీసీసీఐ

భారత క్రికెట్ నియంత్రణ మండలి (బీసీసీఐ) మహిళల ప్రీమియర్ లీగ్ (డబ్ల్యూపీఎల్) 2026 జనవరి 9న ప్రారంభమై ఫిబ్రవరి 5 వరకు జరుగుతుందని అధికారికంగా ప్రకటించింది. మ్యాచ్‌లు నవీ ముంబై, వడోదరాలలో నిర్వహించబడతాయి. పూర్తి మ్యాచ్ షెడ్యూల్ త్వరలో వెలువడుతుందని కూడా బీసీసీఐ వెల్లడించింది.

న్యూఢిల్లీలో కొనసాగుతున్న డబ్ల్యూపీఎల్ మెగా వేలం సందర్భంగా, లీగ్ ఛైర్మన్ జయేశ్ జార్జ్ కీలక వేదికల వివరాలను వెల్లడించారు. ఇటీవల మహిళల ప్రపంచ కప్ ఫైనల్‌ను నిర్వహించిన నవీ ముంబైలోని డీవై పాటిల్ స్టేడియంలో నాలుగో సీజన్ ప్రారంభమవుతుంది. డబ్ల్యూపీఎల్ 2026 ఫైనల్ మ్యాచ్ వడోదరలోని బీసీఏ స్టేడియంలో జరుగుతుంది.

గత సీజన్‌లలో బెంగళూరు, లక్నో, ముంబై, వడోదరా వంటి నగరాల్లో మ్యాచ్‌లు జరిగాయి. ఇప్పటివరకు జరిగిన మూడు సీజన్‌లలో ముంబై ఇండియన్స్ రెండు సార్లు విజేతగా నిలవగా, ఆర్‌సీబీ ఒకసారి గెలిచింది.

ఇటీవల భారతదేశం మహిళల వన్డే ప్రపంచ కప్ గెలుపొందిన నేపథ్యంలో మహిళల క్రికెట్ పట్ల ఉత్సాహం అసాధారణ స్థాయికి చేరుకుంది. హర్మన్‌ప్రీత్ కౌర్ సారథ్యంలో భారత్ దక్షిణాఫ్రికాను 52 పరుగుల తేడాతో ఓడించగా, షఫాలీ వర్మ (87), దీప్తి శర్మ (58) అద్భుతమైన ప్రదర్శన కనబరిచారు. డబ్ల్యూపీఎల్ 2026 మెగా వేలంలో దీప్తి శర్మ ₹3.20 కోట్లకు అమ్ముడుపోగా, యూపీ వారియర్జ్ ఆమెను రికార్డు ధరతో సొంతం చేసుకుంది.