టీ20 పోరాటం ప్రారంభం: భారత జోరు ఇంకా కొనసాగుతుందా?

భారత్ టీ20 ఫార్మాట్‌లో మంచి ఫామ్‌లో కొనసాగుతోంది. గత ఏడాది టీ20 వరల్డ్ కప్ గెలిచిన టీమిండియా, ఆ తర్వాత ఆసియా కప్‌, అలాగే ఆస్ట్రేలియాతో జరిగిన టీ20 సిరీస్‌ను కూడా కైవసం చేసుకుంది. ఇప్పుడు సౌతాఫ్రికాతో ఐదు మ్యాచ్‌ల టీ20 సిరీస్‌కు సిద్ధమైంది. టెస్ట్ సిరీస్‌ను దక్షిణాఫ్రికా గెలిచినా, వన్డే సిరీస్‌లో భారత్ బలంగా తిరిగి వచ్చి విజయం సాధించింది. ఇక కటక్‌లో జరగబోయే తొలి టీ20తో ఈ కొత్త సిరీస్ ప్రారంభం కానుండటంతో, అభిమానుల్లో భారీ ఉత్సాహం కలిగింది.

సూర్యకుమార్ యాదవ్ నేతృత్వంలో టీ20ల్లో భారత్‌కు విజయాలు వస్తున్నా, సూర్య మరియు గిల్ ఇద్దరూ ఇటీవల బ్యాటింగ్ ఫామ్‌లో కష్టాలు ఎదుర్కొంటున్నారు. సూర్య ఈ ఏడాది 17 మ్యాచ్‌ల్లో కేవలం 184 పరుగులే చేయగా, వైస్ కెప్టెన్ గిల్ కూడా టీ20ల్లో తన పాత రిథమ్‌ను పొందలేకపోతున్నాడు. రాబోయే టీ20 వరల్డ్ కప్ దృష్ట్యా ఈ సిరీస్ ఇద్దరికీ అత్యంత కీలకంగా మారింది. వీరిద్దరూ తమ ఫామ్ తిరిగి సాధించుకోవడానికి ఈ సిరీస్‌ను పెద్ద అవకాశంగా ఉపయోగించుకోవాలని భావిస్తున్నారు.

ఈసారి సిరీస్‌లో అత్యంత దృష్టిని ఆకర్షిస్తున్న పేరు హార్దిక్ పాండ్యా. ఆసియా కప్‌లో గాయంతో దూరమైన అతను తాజాగా సయ్యద్ ముస్తాక్ అలీ ట్రోఫీలో బరోడా తరఫున అద్భుత ఇన్నింగ్స్‌తో రీ-ఎంట్రీ సౌండ్ ఇచ్చాడు. కటక్‌లో జరిగిన ప్రాక్టీస్ సెషన్‌లో స్ట్రెచింగ్, రన్నింగ్ డ్రిల్స్‌తో పాటు 20 నిమిషాలపాటు బౌలింగ్ ప్రాక్టీస్ చేసిన హార్దిక్ పూర్తిగా సిద్ధమయ్యాడు. అతని ఆల్‌రౌండ్ ప్రదర్శన ఈ సిరీస్‌లో భారత్‌కు కీలక ఆయుధంగా మారనుంది.