ముకేశ్, సిరాజ్ దెబ్బకు కుప్పకూలిన న్యూజిలాండ్

క్రైస్ట్‌చర్చిలో న్యూజిలాండ్-ఏతో జరుగుతున్న రెండో అనధికారిక టెస్టులో భారత్-ఏ బౌలర్లు అద్భుత ప్రదర్శన చేశారు. ముకేశ్ కుమార్ ఐదు వికెట్లతో చెలరేగగా, మహమ్మద్ సిరాజ్ నాలుగు వికెట్లు పడగొట్టాడు. వాషింగ్టన్ సుందర్ ఒక వికెట్ తీశాడు. దీంతో న్యూజిలాండ్-ఏ జట్టు తొలి ఇన్నింగ్స్‌లో 424 పరుగులకు ఆలౌటైంది. ఫలితంగా భారత జట్టుపై 78 పరుగుల ఆధిక్యం సాధించింది. కివీస్ బ్యాటర్లలో మాథ్యూ బోలె 152 బంతుల్లో 110 పరుగులతో సెంచరీ సాధించగా, డీన్ ఫాక్స్‌క్రాఫ్ట్ 93 పరుగులు చేసి శతకానికి ఏడు పరుగుల దూరంలో నిలిచాడు. క్రిస్టియన్ క్లార్క్ 41, ఫ్రేసర్ షీట్ 40, జార్రోడ్ మెక్‌కే 33, జైడెన్ లెన్నోక్స్ అజేయంగా 32 పరుగులు చేశారు.

369 పరుగుల వద్ద తొమ్మిదో వికెట్ కోల్పోయిన న్యూజిలాండ్-ఏ చివరి వికెట్‌కు మరో 55 పరుగులు జోడించింది. ఆఖరి వికెట్ కోసం భారత బౌలర్లు తీవ్రంగా శ్రమించాల్సి వచ్చింది. చివరకు వాషింగ్టన్ సుందర్ జార్రోడ్ మెక్‌కేను ఔట్ చేయడంతో కివీస్ ఇన్నింగ్స్ ముగిసింది. అంతకుముందు భారత్-ఏ తమ తొలి ఇన్నింగ్స్‌లో 346 పరుగులకు ఆలౌటైంది. కెప్టెన్ ధ్రువ్ జురెల్ సెంచరీతో రాణించగా, దేవదత్ పడిక్కల్ అర్ధసెంచరీ సాధించాడు. ఇరు జట్ల మధ్య జరిగిన తొలి అనధికారిక టెస్టు డ్రాగా ముగిసింది.