భారతీయ వాచ్‌ మార్కెట్లో మళ్లీ సత్తా చాటేందుకు హెచ్‌ఎంటీ సిద్ధం

ఇటీవల విడుదల చేసిన గండభేరుండ శ్రేయి చేతి గడియారాలకు మంచి డిమాండ్‌ రావడంతో హిందుస్థాన్‌ మెషిన్‌ టూల్స్‌ (హెచ్‌ఎంటీ) మరో నాలుగు కొత్త వాచీలను మార్కెట్లోకి తీసుకొచ్చింది. ‘కన్నడిగ’ విభాగంలో భాగంగా ఆదివారం వీటిని విడుదల చేసింది. లోహపు, తోలుతో తయారు చేసిన బెల్టులతో ఈ వాచీలు అందుబాటులోకి వచ్చాయి. ఆఫ్‌లైన్‌, ఆన్‌లైన్‌ విక్రయాల్లో వీటికి వినియోగదారుల నుంచి మంచి స్పందన లభిస్తుందని కేంద్ర మంత్రి హెచ్‌.డి. కుమారస్వామి ధీమా వ్యక్తం చేశారు. ఈ కొత్త వాచీల ధరలను రూ.2,000 నుంచి రూ.2,500 మధ్య నిర్ణయించారు. దీంతో హెచ్‌ఎంటీ అభిమానులకు అందుబాటు ధరల్లో కొత్త మోడళ్లు లభించనున్నాయి.

మరోవైపు, త్వరలోనే మరిన్ని ఖరీదైన, విలాసవంతమైన చేతి గడియారాలను జాతీయ మార్కెట్లోకి తీసుకురావడానికి హెచ్‌ఎంటీ సన్నాహాలు చేస్తోందని కుమారస్వామి వెల్లడించారు. హెచ్‌ఎంటీ స్కెలిటన్‌, నాస్‌ 12 బ్లూ, స్టెల్లార్‌ డాస్‌ 07, స్టెల్లార్‌ డాస్‌ 06 శ్రేణుల్లో కొత్త మోడళ్లను అందుబాటులోకి తీసుకురావడానికి చర్యలు చేపడుతున్నట్లు తెలిపారు. కొత్త కలెక్షన్లతో పాటు ప్రీమియం వాచీలను కూడా పరిచయం చేయడం ద్వారా భారత వాచ్‌ మార్కెట్లో తమ ఉనికిని మరింత విస్తరించుకోవాలని హెచ్‌ఎంటీ లక్ష్యంగా పెట్టుకుంది.