మరోసారి నెటిజన్ల ట్రోలింగ్‌కు గురైన పాక్ ప్రధాని షెహబాజ్ షరీఫ్!

పాకిస్థాన్ ప్రధాని షెహబాజ్ షరీఫ్ మరోసారి సోషల్ మీడియాలో ట్రోలింగ్‌కు గురయ్యారు. తమ క్రికెట్ జట్టు విజయాన్ని అభినందిస్తూ ఆయన చేసిన పోస్టు నెట్టింట చర్చనీయాంశంగా మారింది. శనివారం లాహోర్‌లోని గడాఫీ స్టేడియంలో జరిగిన ముక్కోణపు వన్డే సిరీస్ ఫైనల్‌లో పాకిస్థాన్ జట్టు శ్రీలంకపై మూడు వికెట్ల తేడాతో విజయం సాధించింది. ఈ సందర్భంగా ప్రధాని షెహబాజ్ షరీఫ్ సోషల్ మీడియా వేదికగా జట్టుకు శుభాకాంక్షలు తెలిపారు. ఆటగాళ్లతో పాటు కోచింగ్ సిబ్బంది, పాకిస్థాన్ క్రికెట్ బోర్డు (PCB) ఛైర్మన్ మొహ్సిన్ నఖ్వీని కూడా ప్రశంసించారు. అయితే ఈ పోస్టుపై నెటిజన్లు భిన్నంగా స్పందించారు.

కొంతమంది నెటిజన్లు ప్రధాని అత్యుత్సాహాన్ని ప్రశ్నిస్తూ వ్యంగ్యంగా కామెంట్లు చేశారు. ఇది కేవలం ముక్కోణపు సిరీస్ విజయం మాత్రమేనని, దీనిని చారిత్రాత్మక విజయంగా భావించాల్సిన అవసరం లేదని వ్యాఖ్యానించారు. ప్రతి చిన్న విజయానికీ ఇంత భారీ స్థాయిలో అభినందనలు తెలపాలా? అంటూ మరికొందరు ట్రోల్ చేశారు. రెండు రోజుల క్రితం హాంకాంగ్ సిక్సెస్ టోర్నీలో భారత్‌పై పాకిస్థాన్ సాధించిన విజయాన్ని కూడా షరీఫ్ ఇదే తరహాలో ప్రశంసించడంతో విమర్శలు ఎదుర్కొన్నారు. దీంతో తాజా విజయంపై జట్టు ప్రదర్శన కంటే ప్రధాని అభినందనల పోస్టే సోషల్ మీడియాలో ఎక్కువ చర్చకు దారితీసింది.