సంజు శాంసన్‌పై అశ్విన్‌ వ్యాఖ్యలు..అభిమాని ప్రశ్నలకు గట్టి కౌంటర్‌

న్యూజిలాండ్‌తో జరిగిన ఐదు టీ20ల సిరీస్‌లో సంజు శాంసన్‌ మొత్తం 107 పరుగులు చేశాడు. అయితే చివరి మ్యాచ్‌లో 10 బంతులు ఎదుర్కొని కేవలం నాలుగు పరుగులే చేయడంతో అతడి ప్రదర్శనపై విమర్శలు వ్యక్తమయ్యాయి. వైభవ్‌ సూర్యవంశీని బెంచ్‌కే పరిమితం చేసినప్పటికీ జట్టు మేనేజ్‌మెంట్‌ సంజుపై నమ్మకంతో అతడికి అవకాశం ఇచ్చింది. ఈ నేపథ్యంలో సంజును తన ఫస్ట్‌ ఛాయిస్‌ ఆటగాడిగా పేర్కొన్న మాజీ క్రికెటర్‌ రవిచంద్రన్‌ అశ్విన్‌ వ్యాఖ్యలు చర్చకు దారితీశాయి. సంజు సిరీస్‌ మొత్తం ఆశించిన స్థాయిలో రాణించలేదని పేర్కొంటూ ఓ అభిమాని సోషల్‌ మీడియాలో అశ్విన్‌ను ప్రశ్నించాడు.

దీనికి అశ్విన్‌ స్పందిస్తూ.. ‘‘సంజు నా ఫస్ట్‌ ఛాయిస్‌. కానీ, మీరెప్పుడూ అతడి గురించే ఆలోచిస్తున్నారు’’ అని కౌంటర్‌ ఇచ్చాడు. అయినప్పటికీ ఆ అభిమాని మరోసారి ఘాటుగా స్పందించాడు. ‘‘మీ అభిప్రాయాన్ని నేరుగా చెప్పొచ్చు కదా.. ప్రాంతీయవాదాన్ని ఎందుకు తెరపైకి తెస్తున్నారు? వైభవ్‌ సూర్యవంశీ ఇప్పుడు దేశం మొత్తానికీ ఫస్ట్‌ ఛాయిస్‌గా ఉన్నాడు. మీరు మాత్రం సంజుకే ప్రాధాన్యం ఇస్తున్నారు’’ అంటూ కామెంట్‌ చేశాడు. అశ్విన్‌, అభిమాని మధ్య జరిగిన ఈ సోషల్‌ మీడియా వాగ్వాదం క్రికెట్‌ అభిమానుల్లో చర్చనీయాంశంగా మారింది.