ఇండియా-ఏ హెడ్‌ కోచ్‌గా లక్ష్మీపతి బాలాజీ

టీమిండియా మాజీ పేసర్‌ లక్ష్మీపతి బాలాజీకి కీలక బాధ్యతలు దక్కాయి. ప్రముఖ వార్తా సంస్థ పీటీఐ నివేదిక ప్రకారం.. ఆస్ట్రేలియా-ఏతో జరగనున్న మల్టీ ఫార్మాట్‌ సిరీస్‌కు ఇండియా-ఏ జట్టు హెడ్‌ కోచ్‌గా బాలాజీని నియమించారు. సెప్టెంబర్‌ 22 నుంచి అక్టోబర్‌ 11 వరకు పుదుచ్చేరిలో జరిగే ఈ సిరీస్‌లో రెండు అనధికారిక టెస్టులు, మూడు వన్డేలు ఉన్నాయి. భారత్‌ తరఫున ప్రాతినిధ్యం వహించే జట్టుకు బాలాజీ హెడ్‌ కోచ్‌గా వ్యవహరించడం ఇదే తొలిసారి.

బాలాజీ గతంలో కోల్‌కతా నైట్‌రైడర్స్‌, చెన్నై సూపర్‌ కింగ్స్‌ జట్లకు బౌలింగ్‌ కోచ్‌గా పనిచేశారు. 2002 నుంచి 2012 వరకు భారత్‌కు ప్రాతినిథ్యం వహించిన ఆయన 8 టెస్టులు, 30 వన్డేలు, 5 టీ20లు ఆడి 71 వికెట్లు తీశారు. ఆస్ట్రేలియా-ఏ సిరీస్‌లో మల్టీ డే మ్యాచ్‌లకు దేవదత్‌ పడిక్కల్‌, వన్డేలకు రుతురాజ్‌ గైక్వాడ్‌ కెప్టెన్లుగా వ్యవహరించనున్నారు. సాయి సుదర్శన్‌, అన్షుల్‌ కంబోజ్‌, తనుష్‌ కోటియన్‌, రజత్‌ పాటిదార్‌, హార్దిక్‌ పాండ్యా తదితరులు జట్లలో చోటు దక్కించుకున్నారు.