కొరియాకు షాక్ ఇచ్చిన భారత మహిళల రికర్వ్ జట్టు...

ఆర్చరీ వరల్డ్ కప్ స్టేజ్-2లో భారత మహిళల రికర్వ్ జట్టు సంచలన ప్రదర్శనతో ఫైనల్లోకి దూసుకెళ్లింది. పదిసార్లు ఒలింపిక్ చాంపియన్ అయిన దక్షిణ కొరియాపై భారత జట్టు 5-1 తేడాతో ఘన విజయం సాధించింది. అంకిత భకత్, కుంకుం అనిల్ మొహోద్, దీపికా కుమారితో కూడిన భారత జట్టు అద్భుత ప్రదర్శనతో పసిడి పోరుకు అర్హత సాధించింది. ఆదివారం జరిగే ఫైనల్లో భారత్ రెండో సీడ్ చైనాతో తలపడనుంది.

అయితే ఇతర విభాగాల్లో భారత జట్లకు నిరాశ ఎదురైంది. ధీరజ్ బొమ్మదేవర, తరుణ్‌దీప్ రాయ్, యశ్‌దీప్ భోగేతో కూడిన పురుషుల రికర్వ్ జట్టు రెండో రౌండ్‌లో బంగ్లాదేశ్ చేతిలో 2-6తో ఓడిపోయింది. రికర్వ్ మిక్స్‌డ్ విభాగంలో ధీరజ్-అంకిత జోడీ బ్రెజిల్ జంట చేతిలో 4-5తో తృటిలో పరాజయం పాలైంది. కాంపౌండ్ మిక్స్‌డ్ క్వార్టర్ ఫైనల్లో అదితి స్వామి-ప్రవీణ్ జంట అమెరికా చేతిలో 156-157 తేడాతో ఓటమి చవిచూసింది.