బిహార్‌ నుంచి జపాన్‌ వరకు.. అభిషేక్‌ ఆనంద్‌ క్రికెట్‌ కథ!

భారత్‌లో క్రికెట్‌కు ఉన్న ఆదరణ గురించి ప్రత్యేకంగా చెప్పాల్సిన అవసరం లేదు. అయితే బిహార్‌లోని రోహ్తాస్‌కు చెందిన అభిషేక్‌ ఆనంద్‌ మాత్రం తన క్రికెట్‌ అభిరుచిని జపాన్‌ వరకు తీసుకెళ్లి అక్కడి జాతీయ జట్టులో చోటు సంపాదించారు. ఐఐటీ కాన్పూర్‌లో కెమిస్ట్రీలో ఉన్నత విద్యను అభ్యసించిన ఆయన.. చదువుతున్న సమయంలోనే క్రికెట్‌ ఆడటంతో పాటు జట్టు కెప్టెన్‌గా కూడా వ్యవహరించారు. చదువు పూర్తయ్యాక ఉద్యోగం కోసం టోక్యో వెళ్లినప్పటికీ క్రికెట్‌ను కొనసాగించారు. అక్కడ క్లబ్‌ క్రికెట్‌లో రాణించి జపాన్‌ జాతీయ జట్టుకు ఎంపికయ్యారు. భారత్‌తో సెప్టెంబర్‌ 22న జరగనున్న చారిత్రాత్మక టీ20కి ముందు ఆయనకు సంబంధించిన వీడియో వైరల్‌గా మారింది. బిహార్‌ నుంచి వచ్చి జపాన్‌ తరఫున ఆడటంపై అడిగిన ప్రశ్నకు ఆయన చెప్పిన “బిహారీ ఎక్కడ లేడు భాయ్‌” అనే సమాధానం ఆకట్టుకుంటోంది.

అయితే భారత్‌తో జరగనున్న ఈ మ్యాచ్‌ కోసం ప్రకటించిన జపాన్‌ 15 మంది సభ్యుల జట్టులో అభిషేక్‌ ఆనంద్‌కు చోటు దక్కలేదు. సెప్టెంబర్‌ 22న తొచిగీ ప్రిఫెక్చర్‌లోని సానో ఇంటర్నేషనల్‌ క్రికెట్‌ గ్రౌండ్‌లో భారత్‌, జపాన్‌ జట్లు తొలిసారి అంతర్జాతీయ మ్యాచ్‌లో తలపడనున్నాయి. ఈ మ్యాచ్‌ భారత్‌-జపాన్‌ దౌత్య సంబంధాల 75వ వార్షికోత్సవం సందర్భంగా నిర్వహిస్తుండగా, 2026 ఆసియా క్రీడలకు సన్నాహకంగా కూడా ఉపయోగపడనుంది. 28 ఏళ్ల అభిషేక్‌ 2025లో కుక్‌ ఐలాండ్స్‌తో మ్యాచ్‌ ద్వారా జపాన్‌ తరఫున టీ20 అంతర్జాతీయ అరంగేట్రం చేశారు. ఇప్పటివరకు 18 టీ20ల్లో 275 పరుగులు, అత్యధికంగా 55 పరుగులు, ఒక వికెట్‌ సాధించినట్లు తాజా నివేదికలు పేర్కొంటున్నాయి.