బంగ్లాదేశ్‌ బౌలర్‌ ముస్తాఫిజుర్‌ కు బీసీసీఐ షాక్‌

ఐపీఎల్ 2026 మినీ వేలంలో బంగ్లాదేశ్ స్టార్ ఫాస్ట్ బౌలర్ ముస్తాఫిజుర్ రెహమాన్ ను కోల్‌కతా నైట్ రైడర్స్ (కేకేఆర్) రూ.9.2 కోట్లకు కొనుగోలు చేసిన విషయం ఇటీవల పెద్ద చర్చకు దారి తీసింది. షారూఖ్ ఖాన్ యాజమాన్యంలోని కేకేఆర్ ఈ ఆటగాడిని తీసుకోవడం పై తీవ్ర విమర్శలు వెల్లువెత్తాయి.

ఇటీవల బంగ్లాదేశ్‌లో హిందువుల పై జరిగిన వరుస దాడుల నేపథ్యంలో, ముస్తాఫిజుర్‌ను భారీ మొత్తానికి కొనుగోలు చేయడం పై సోషల్ మీడియాలోనూ, అభిమానుల మధ్యనూ వ్యతిరేకత వ్యక్తమైంది. ఈ పరిణామాల నేపథ్యంలో బీసీసీఐ కీలక నిర్ణయం తీసుకుంది.

కేకేఆర్ ముస్తాఫిజుర్ రెహమాన్‌ను జట్టులో కొనసాగించకుండా విడుదల చేయాలని బీసీసీఐ ఆదేశించినట్లు సమాచారం. తాజా పరిస్థితులను దృష్టిలో పెట్టుకుని ఈ నిర్ణయం తీసుకున్నామని బీసీసీఐ కార్యదర్శి దేవజిత్ సైకియా వెల్లడించారు. ఈ వ్యవహారం ఐపీఎల్ ప్రతిష్ఠకు, భావోద్వేగాలకు సంబంధించిన అంశంగా మారిందని ఆయన పేర్కొన్నారు.

అలాగే, ముస్తాఫిజుర్ స్థానంలో మరో ఆటగాడిని తీసుకోవాలనుకుంటే, ఆ స్థానాన్ని భర్తీ చేసుకునేందుకు కేకేఆర్‌కు బీసీసీఐ అనుమతి ఇస్తుందని స్పష్టం చేశారు. దీంతో ఐపీఎల్ 2026 ముందు కేకేఆర్ జట్టులో కీలక మార్పులు చోటుచేసుకునే అవకాశం కనిపిస్తోంది.