పోలండ్‌లో కాల్పుల కలకలం..

పోలండ్‌లోని క్రాకోవ్ నగరంలో శనివారం మధ్యాహ్నం జరిగిన కాల్పులు తీవ్ర కలకలం సృష్టించాయి. నగరంలోని ప్రధాన మార్కెట్ స్క్వేర్‌ వద్దకు వాహనంలో వచ్చిన ఓ సాయుధుడు విచక్షణారహితంగా కాల్పులు జరిపాడు. ఈ ఘటనలో తొలుత ఐదుగురు మృతి చెందినట్లు, 12 మంది గాయపడినట్లు సమాచారం వెలువడగా.. అనంతరం మృతుల సంఖ్య ఆరుకు, క్షతగాత్రుల సంఖ్య 15కు చేరినట్లు స్థానిక అధికారులు వెల్లడించారు. సమాచారం అందుకున్న పోలీసులు వెంటనే ఘటనా స్థలానికి చేరుకుని దుండగుడితో ఎదురు కాల్పులు జరిపారు. అనంతరం అతడిని కాల్చి అదుపులోకి తీసుకుని చికిత్స నిమిత్తం ఆసుపత్రికి తరలించారు.

ఈ ఘటనపై పోలండ్ ప్రధానమంత్రి డొనాల్డ్ టస్క్ స్పందిస్తూ తీవ్ర విచారం వ్యక్తం చేశారు. దాడికి సంబంధించిన వివరాలను ఎప్పటికప్పుడు తెలుసుకుంటున్నానని తెలిపారు. కాల్పులకు గల కారణాలు, నిందితుడి నేపథ్యం, దాడి వెనుక ఉద్దేశాన్ని గుర్తించేందుకు పోలీసులు దర్యాప్తు చేపట్టారు. పోలండ్‌లో రెండో అతిపెద్ద నగరమైన క్రాకోవ్.. రాజధాని వార్సాకు సుమారు 250 కిలోమీటర్ల దూరంలో ఉంది. పర్యాటకంగా ఎంతో ప్రాధాన్యం ఉన్న ఈ నగరంలోని ప్రధాన మార్కెట్ స్క్వేర్‌ వద్ద జరిగిన ఘటన స్థానికంగా తీవ్ర ఆందోళనకు దారితీసింది.