డోపింగ్ పరీక్షలో ఆస్ట్రేలియా క్రికెటర్ క్రిస్ లిన్.. నిషేధంపై ఆసక్తికర ట్విస్ట్!

ఆస్ట్రేలియా స్టార్ టీ20 క్రికెటర్, కోల్‌కతా నైట్ రైడర్స్ మాజీ ఆటగాడు క్రిస్ లిన్‌కు డోపింగ్ వ్యవహారంలో షాక్ తగిలింది. కొకైన్ వినియోగానికి సంబంధించిన ఆనవాళ్లు పరీక్షల్లో గుర్తించడంతో అతడిపై నెల రోజుల నిషేధం విధించినట్లు ఇంగ్లాండ్ క్రికెట్ రెగ్యులేటర్ శుక్రవారం వెల్లడించింది. ఇంగ్లాండ్‌లో జరిగిన టీ20 బ్లాస్ట్ ఫైనల్స్ సందర్భంగా జూలై 18న నిర్వహించిన సాధారణ యాంటీ డోపింగ్ పరీక్షలో 36 ఏళ్ల క్రిస్ లిన్ పట్టుబడ్డాడు. ఆ సమయంలో అతడు నార్తాంప్టన్‌షైర్ జట్టు తరఫున ఆడుతున్నాడు. పరీక్షల్లో కొకైన్‌కు సంబంధించిన మెటాబొలైట్ అయిన బెంజాయిలెక్గోనైన్ స్వల్ప స్థాయిలో ఉన్నట్లు గుర్తించారు. ఈ ఉల్లంఘనను లిన్ అంగీకరించినట్లు అధికారులు తెలిపారు.

ఈ వ్యవహారంలో తొలుత మూడు నెలల నిషేధం విధించే అవకాశం ఉన్నప్పటికీ, లిన్ పునరావాస కార్యక్రమాన్ని పూర్తి చేయడం, ఈ ఘటన క్రీడా పోటీకి వెలుపల జరగడం, అతడి ఆటతీరును మెరుగుపరచడానికి సంబంధం లేకపోవడం వంటి అంశాలను పరిగణనలోకి తీసుకుని నిషేధాన్ని నెల రోజులకు తగ్గించారు. ఇప్పటికే ఆ గడువు పూర్తయినట్లు రెగ్యులేటర్ స్పష్టం చేసింది. క్రిస్ లిన్ ఆస్ట్రేలియా తరఫున 18 టీ20 అంతర్జాతీయ మ్యాచ్‌లు, నాలుగు వన్డేలు ఆడాడు. ఐపీఎల్‌లో డెక్కన్ ఛార్జర్స్, కోల్‌కతా నైట్ రైడర్స్, ముంబై ఇండియన్స్ జట్లకు ప్రాతినిధ్యం వహించాడు. బిగ్ బాష్ లీగ్ చరిత్రలో అత్యధిక పరుగులు చేసిన ఆటగాడిగా గుర్తింపు పొందిన లిన్, రాబోయే సీజన్‌లో మెల్‌బోర్న్ రెనెగేడ్స్ జట్టులో చేరే అవకాశం ఉన్నట్లు వార్తలు వస్తున్నాయి.