బిగ్ బాస్ తెలుగు 10: రైతు బిడ్డ ఝాన్సీపై ట్రోల్స్.. విమర్శకులకు గట్టి కౌంటర్ ఇచ్చిన తల్లి

బిగ్ బాస్ తెలుగు సీజన్ 10 ఆసక్తికరంగా, రసవత్తరంగా సాగుతోంది. సెప్టెంబర్ 7న ప్రారంభమైన ఈ రియాలిటీ షోలో తొలి వారంలోనే ఇద్దరు కంటెస్టెంట్లు ఎలిమినేట్ అయ్యారు. ఇక రెండో వారంలో సుమారు 11 మంది నామినేషన్స్‌లో ఉండటంతో ఈ వారం ఎవరు హౌస్ నుంచి బయటకు వెళ్లబోతున్నారనే ఉత్కంఠ నెలకొంది. గత సీజన్ల మాదిరిగానే ఈసారి కూడా సెలబ్రిటీలతో పాటు కామనర్ కేటగిరీకి చెందిన పలువురు హౌస్‌లోకి అడుగుపెట్టారు. బిగ్ బాస్ అగ్నిపరీక్ష సీజన్ 2 ద్వారా ఎంపికైన ఆరుగురు కామనర్లలో రైతు బిడ్డ, సింగర్ ఝాన్సీ కూడా ఒకరు. సాధారణ రైతు కుటుంబంలో జన్మించిన ఝాన్సీ తన తండ్రికి వ్యవసాయ పనుల్లో చేదోడువాదోడుగా ఉంటూనే ఉన్నత చదువులు కొనసాగిస్తోంది. అగ్నిపరీక్ష సీజన్ 2లో తన ప్రతిభను చాటుకున్న ఆమె బిగ్ బాస్ తెలుగు 10లో మెయిన్ కంటెస్టెంట్‌గా అవకాశం దక్కించుకుంది.

అయితే బిగ్ బాస్ హౌస్‌లోకి వెళ్లిన తర్వాత ఝాన్సీ ఆటతీరుపై సోషల్ మీడియాలో విమర్శలు వస్తున్నాయి. ఆమె గేమ్‌లో మార్పు వచ్చిందని, స్వార్థంగా ఆడుతోందని కొందరు నెటిజన్లు కామెంట్లు చేస్తున్నారు. తోటి కంటెస్టెంట్ల విషయంలో వెన్నుపోటు ధోరణి అవలంబిస్తోందంటూ మరికొందరు విమర్శిస్తున్నారు. అంతేకాకుండా ‘రైతు బిడ్డ’ అనే ఇమేజ్‌ను గేమ్‌లో భాగంగా ఉపయోగించుకుంటోందంటూ కొందరు ట్రోల్ చేస్తున్నారు. మరికొందరు ఆమెను గతంలో బిగ్ బాస్‌లో పాల్గొన్న పల్లవి ప్రశాంత్‌తో పోలుస్తున్నారు. ఈ నేపథ్యంలో ఝాన్సీపై వస్తున్న విమర్శలకు ఆమె తల్లి హేమలత స్పందించి కుమార్తెకు మద్దతుగా నిలిచారు. ఝాన్సీ బిగ్ బాస్‌లోకి వెళ్లడం ఎంతో సంతోషంగా ఉందని, తన కుమార్తె అద్భుతంగా ఆట ఆడుతోందని ఆమె పేర్కొన్నారు. రెండు తెలుగు రాష్ట్రాల్లో లక్షలాది మంది ఝాన్సీని అభిమానిస్తున్నారని, కొంతమంది మాత్రమే ఆమెను విమర్శిస్తున్నారని చెప్పారు. ఝాన్సీ స్థానంలో తమ కుటుంబంలోని అక్క లేదా చెల్లెలు ఉంటే ఇలాగే విమర్శలు చేసేవారా అని ఆమె ప్రశ్నించారు. చిన్నప్పటి నుంచే ఝాన్సీ ఎంతో కష్టపడి పనిచేసే స్వభావం కలిగిన అమ్మాయి అని, ఆ కష్టపడే గుణమే ఆమెను ఈ స్థాయికి తీసుకొచ్చిందని హేమలత తెలిపారు. ప్రస్తుతం ఈ వ్యాఖ్యలపై నెటిజన్లు భిన్నంగా స్పందిస్తున్నారు. కొందరు ఝాన్సీకి మద్దతు ఇస్తుండగా, మరికొందరు ఆమె గేమ్‌పై విమర్శలు కొనసాగిస్తున్నారు.