సుంకాల అమలుపై ట్రంప్‌దే తుది నిర్ణయం

రష్యాపై ఆర్థిక ఒత్తిడిని మరింత పెంచే లక్ష్యంతో అమెరికా ప్రతినిధుల సభ కీలక బిల్లును ఆమోదించింది. ‘లిండ్సే ఓ. గ్రాహమ్ సాంక్షనింగ్ రష్యా అండ్ ఇరాన్ యాక్ట్ 2026’గా పిలుస్తున్న ఈ బిల్లులో రష్యా ఇంధన, రక్షణ రంగాలపై కఠిన ఆంక్షలకు నిబంధనలు ఉన్నాయి. అలాగే రష్యా నుంచి చమురు, సహజవాయువు కొనుగోలు చేసే దేశాలపై 100 శాతం వరకు సుంకాలు విధించే అధికారాన్ని అధ్యక్షుడు డొనాల్డ్ ట్రంప్‌కు కల్పించే నిబంధన ఉంది. భారత్, చైనా వంటి దేశాలు ఈ నిబంధన పరిధిలోకి వచ్చే అవకాశం ఉంది.

ఇరాన్‌పై అదనపు ఆంక్షలకు కూడా బిల్లులో నిబంధనలు ఉన్నాయి. ట్రంప్‌కు విస్తృత సుంకాల అధికారాలు ఇవ్వడంపై కొందరు డెమొక్రాట్లు అభ్యంతరం వ్యక్తం చేశారు. అయితే సుంకాల అమలు తక్షణమే జరగదని, దీనిపై తుది నిర్ణయం ట్రంప్‌దేనని స్పష్టమవుతోంది. ఈ పరిణామం భారత్‌-అమెరికా వాణిజ్య సంబంధాలు, రష్యా నుంచి భారత్‌ చమురు దిగుమతులు, ఇంధన వ్యూహాలపై కొత్త అనిశ్చితిని పెంచే అవకాశం ఉందని విశ్లేషణలు పేర్కొంటున్నాయి.