రేవంత్ దూకుడు.. జూబ్లీహిల్స్ ఎన్నికను ప్రతిష్టాత్మక యుద్ధంగా మార్చిన సీఎం!

తెలంగాణ సీఎం రేవంత్ రెడ్డి ఎక్కడా వెనక్కి తగ్గే వ్యక్తి కాదనే విషయం మళ్లీ రుజువైంది. 2023 ఎన్నికల్లో కాంగ్రెస్‌ను తిరిగి అధికారంలోకి తెచ్చిన ఆయన ఇప్పుడు జూబ్లీహిల్స్ ఉప ఎన్నికపై దృష్టి సారించారు. సాధారణంగా ఈ ఉప ఎన్నిక పెద్దగా ప్రాధాన్యత కలిగినది కాదని అనుకున్నా, బీఆర్ఎస్ నేతలు చేసిన వ్యాఖ్యలు రేవంత్‌ను కదిలించాయి. ముఖ్యంగా కేటీఆర్ చేసిన “ఇది కాంగ్రెస్ పాలనకు రిఫరెండం” అన్న వ్యాఖ్యలతో సీఎం సీరియస్‌గా మారి, ఈ ఎన్నికను ప్రతిష్టాత్మకంగా తీసుకున్నారు. పార్టీ గెలవడం ఖాయం చేసేందుకే రేవంత్ కొత్త రణనీతిని రూపొందించారు. ప్రతి ఎమ్మెల్యే కనీసం వందమంది ఓటర్ల బాధ్యత తీసుకోవాలని ఆదేశించారు. రాష్ట్ర మంత్రులు తమ పరిధిలోని పోలింగ్ కేంద్రాలను నిశితంగా పర్యవేక్షించాలని, రోజువారీగా డివిజన్‌ల వారీగా నేతల పనితీరును అంచనా వేయాలని సూచించారు. అలాగే, ప్రతి రోజు కనీసం 250 ఇళ్లలో ఇంటింటి ప్రచారం జరగాలనేది ఆయన స్పష్టమైన ఆదేశం.

ప్రచార బృందాల్లో రాష్ట్ర నాయకులు, మంత్రులు, ఎంపీలు సమన్వయంగా పనిచేయాలని రేవంత్ స్పష్టం చేశారు. ప్రజలకు సంక్షేమ పథకాలు, అభివృద్ధి కార్యక్రమాలు ఎలా కొనసాగుతున్నాయో వివరించడమే కాకుండా, కాంగ్రెస్ పాలన ఫలితాలను నేరుగా ప్రజల దృష్టికి తీసుకురావాలని ఆయన దిశానిర్దేశం చేశారు. నామినేటెడ్ పదవులు ఉన్న నాయకులు కూడా వీక్ మొత్తం ప్రజల్లో ఉండి పార్టీ తరపున ప్రచారం చేయాలని రేవంత్ ఆదేశించారు. ఈ నెల 9వ తేదీ వరకు ఒక్కరోజు కూడా విరామం లేకుండా పనిచేయాలని ఆయన గట్టిగా సూచించారు. జూబ్లీహిల్స్ ఉప ఎన్నిక రేవంత్‌కు కేవలం ఓ పోటీ కాదు — పార్టీ ప్రతిష్టను కాపాడే ఒక బరిగా మారింది.