రాహుల్ గాంధీ హెచ్చరించిన ‘ఓట్ల చోరీ’ నిజమైంది - డిప్యూటీ సీఎం భట్టి విక్రమార్క

తెలంగాణ ఉప ముఖ్యమంత్రి మల్లు భట్టి విక్రమార్క.. రాహుల్ గాంధీ గతంలో చేసిన ‘ఓట్ల చోరీ’ ఆరోపణలు నిజమవుతున్నాయని వ్యాఖ్యానించారు. ఓటర్ల జాబితాల ప్రత్యేక సమగ్ర సవరణ ప్రక్రియపై కాంగ్రెస్ నిర్వహించిన నిరసనలో పాల్గొన్న ఆయన.. ఎస్‌ఐఆర్‌ పేరుతో పౌరుల ఓట్లను తొలగిస్తున్నారంటూ ఆరోపించారు. ఇది ప్రజల ఓటు హక్కుకు, ప్రజాస్వామ్యానికి ముప్పుగా మారుతుందని అన్నారు. ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ, రాజ్యాంగం, ఓటు హక్కు పరిరక్షణ కోసం కాంగ్రెస్ పోరాటం కొనసాగిస్తుందని తెలిపారు.

ఎస్‌ఐఆర్‌ నిర్వహణ తీరుపై కాంగ్రెస్ చేపట్టిన నిరసనల్లో భాగంగా హైదరాబాద్‌లో పార్టీ నేతలు, కార్యకర్తలు ఆందోళన నిర్వహించారు. చేతిలో రాజ్యాంగ ప్రతిని పట్టుకుని నిరసనలో పాల్గొన్న భట్టి విక్రమార్క ప్రజాస్వామ్యాన్ని, రాజ్యాంగాన్ని విశ్వసించే రాజకీయ పార్టీలు, ప్రజాస్వామ్య శక్తులు తమ పోరాటానికి మద్దతు ఇవ్వాలని పిలుపునిచ్చారు. అనంతరం టీపీసీసీ అధ్యక్షుడు బి. మహేశ్ కుమార్ గౌడ్, మంత్రులు దుద్దిళ్ల శ్రీధర్ బాబు, పొన్నం ప్రభాకర్, మాజీ ఎంపీ మహ్మద్ అజారుద్దీన్‌తో కలిసి ఎన్నికల కమిషన్‌కు వినతిపత్రం సమర్పించినట్లు తెలిపారు. అయితే ఎస్‌ఐఆర్‌కు సంబంధించిన తాజా నిర్ణయాలు పూర్తి కమిషన్ ఆమోదంతోనే తీసుకున్నట్లు ఎన్నికల కమిషన్ స్పష్టం చేసింది.