శరద్ పవార్‌కు ప్రధాని మోదీ ఫోన్‌

మహారాష్ట్ర రాజకీయాల్లో ప్రస్తుతం చర్చంతా ఎన్‌సీపీ అధినేత శరద్ పవార్ చుట్టూనే తిరుగుతోంది. ఓవైపు ఆయన అనారోగ్యంతో ఆస్పత్రిలో చేరినా.. మరోవైపు ఆ రాష్ట్ర రాజకీయ చదరంగంలో ఆయన అడుగులు కొనసాగుతున్నాయి. ఛాతీ ఇన్‌ఫెక్షన్‌తో ముంబైలోని బ్రీచ్‌ క్యాండీ ఆసుపత్రిలో చికిత్స పొందుతున్న 85 ఏళ్ల పవార్‌తో ప్రత్యర్థి వర్గానికి చెందిన ప్రఫుల్‌ పటేల్‌ భేటీ అయ్యారు. అటు ప్రధాని నరేంద్ర మోదీ కూడా ఫోన్‌ చేసి ఆయన్ను పరామర్శించడంతో ఎన్సీపీ రెండు వర్గాల విలీనంపై ఊహాగానాలకు తెరలేపినట్టైంది.

2023లో శరద్‌ పవార్‌కు వ్యతిరేకంగా తిరుగుబాటు చేసి పార్టీని చీల్చిన అజిత్‌ పవార్‌ వర్గం.. ఎన్‌సీపీ పేరు, ఎన్నికల గుర్తును దక్కించుకుంది. ప్రస్తుతం ఆ వర్గానికి సునేత్రా పవార్‌ నాయకత్వం వహిస్తున్నారు. ఈ నేపథ్యంలో ఇరు వర్గాలు మళ్లీ ఒక్కటవుతాయా? లేక శరద్‌ పవార్‌ వర్గం నేరుగా బీజేపీ నేతృత్వంలోని ఎన్డీయేలో చేరుతుందా? అనే విషయమై సందిగ్ధత నెలకొంది.